|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 171 Hüküm no: 124 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mustafa Ağa ve ortağı Aziz Ağa’nın Yorgancı Alaaddin Ağa’da olan alacaklarının tahsil olunması
Ma‘rûz-ı dâ‘î-i Devlet-i aliyyeleridir ki,
Sâhib-i arzuhâl Mustafa Ağa b. İsmail nâm kimesne şerîki Aziz Ağa b. Abdullah hâzır olduğu hâlde Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine mahsûs buyurulan dâirede ma‘kūd meclis-i şer‘de Yorgancı esnâfından medîne-i Üsküdar’da sâkin derûn-ı arzuhâlde ismi mezkûr Alaaddin Ağa b. el-Hâc Mehmed Nuri nâm kimesne muvâcehesinde mezbûr Alaaddin Ağa zimmetinde bundan akdem benimle şerîkim hâzır-ı mezbûrun mâl-ı müşterekimizden ve yedimizden iştirâ ve kabz eylediği mâlıfatura ta‘bîr olunur çit ve Amerikan bezi semenlerinden ba‘de külli’l-hesâb gayr-ı ez-teslîmât sahhu’l-bâkī iki bin guruş alacak hakkımız olmağla hattâ şerîkim hâzır-ı mezbûr Aziz Ağa yedinde olup işbu bin iki yüz elli altı senesi Şa‘bânü’l-mu‘azzamın yirminci günü târîhiyle müverrah bir kıt‘a i‘lâm nâtık olduğu üzere medîne-i Üsküdar Mahkemesi’nde huzûr-ı hâkimü’ş-şer‘de meblağ-ı bâkī-i mezkûr iki bin guruşu mezbûr Alaaddin Ağa’dan da‘vâ, ol dahi cevâbında ber-vech-i muharrer ikrâr ü i‘tirâf etmeğin mûcebince meblağ-ı bâkī-i mezkûrun edâsıyla mezbûr Alaaddin Ağa ilzâm olunmuş idi. El-hâletü hâzihî meblağ-ı bâkī-i mezkûr iki bin guruşu mezbûr Alaaddin Ağa bize edâ ve teslîm etmemekle meblağ-ı bâkī-i mezkûr iki bin guruşu mezbûr Alaaddin Ağa’dan hâlâ teleb ederiz deyü şerîki hâzır-ı merkūm ile ma‘an da‘vâ etdiklerinde ol dahi cevâbında kaziyye minvâl-i meşrûh üzere olduğunu bi-tamâmihâ ikrâr ü i‘tirâf etmeğin mûcebince meblağ-ı bâkī-i mezkûr iki bin guruş mezbûr Alaaddin Ağa’dan tahsîl ve müdde‘iyân-ı şerîkân-ı mezbûrân Mustafa ve Aziz Ağalara teslîm etdirilmek iktizâ eylediği tescîl ve huzûr-ı âlîlerine i‘lâm olundu. El-emru li-men-lehü’l-emr.
Fî 5 Şevvâli’l-mükerrem sene 1256.
|