Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 117 Hüküm no: 107 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Savomol? v. Yani’nin dükkanını Nikola v. Papa Kosta’ya vefâen sattığı Mahmiye-i Galata muzâfâtından kasaba-i Beşiktaş’a tâbi‘ Arnavud nâm karyede sâkin Savamol? v. Yani meclis-i şer‘de Nikola v. Papa Kosta muvâcehesinde bi-tav‘ihî ikrâr ve i‘tirâf edüp karye-i mezbûrede vâki‘ ma‘lûmü’l-hudûd bir bâb mülk bakkal dükkânımı içinde olan bir bâb mahzeni ve sâir tevâbi‘ ve levâhıkı ile ba‘de’t-tahliyeti’ş-şer‘iyye mezbûr Nikola’ya dört bin altı yüz nakd-i râyic fi’l-vakt akçeye bey‘ bi’l-vefâ tarîki üzere târih-i kitâb gününden üç yüz altmış gün tamâmına dek müeccel ve mev‘ûd olmak üzere bey‘ ve teslîm edüp ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mersûm dört bin altı yüz akçeyi yedinden ahz u kabz eyledim şöyle ki târih-i mezbûr tamâmına dek meblağ-ı mezbûru tamâmen kendüye edâ ve teslîm eylemezsem bey‘-i mezbûr bey‘-i bâtta münkalib olup keyfe mâ yeşâ ve yehtâr mutasarrıf olsun deyicek mukırr-ı mezbûru ikrâr-ı meşrûhunda el-mukarru lehü’l-merkūm bi’l-müvâcehe tasdîk ve bi’l-müşâfehe tahkīk ve bi’l-müşâhede mâ-vaka‘a ketb olundu. Fi’l-yevmi’s-sânî aşer min-şehri Rebî‘i’l-âhir li-sene isneteyn ve sittîn ve elf. Şühûdü’l-hâl: İlyas Beşe, Mehmed b. Abdullah, Hudâverdi b. ( ), Mehmed b. Ramazan, Mehmed b. Mahmud ve gayruhüm.