Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 117 Hüküm no: 108 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey’in babası İbrahim Bey b. Receb Kethüdâ’dan intikal eden bağını Ali Bey b. Hasan’a sattığı Mahmiye-i Galata muzâfâtından kasaba-i Beşiktaş’da sâkin iken bundan akdem merhûm olan İbrahim Bey b. Receb Kethüdâ’nın sulbî evlâdından şâbb-ı emred Ali Bey meclis-i şer‘de işbu sâhibü’l-kitâb zahrü’l-a‘yân diğer Ali Bey b. Hasan tarafından bey‘-i âti’l-beyânı tasdîka vekîl olup hasm-ı şer‘î-i câhid mahzarında Ramazan Reis b. Receb ve Yusuf Bey b. Abdullah şehâdetleriyle şer‘an vekâleti sâbite olan Cafer b. Abdullah mahzarında ikrâr ve i‘tirâf edüp kasaba-i mezbûre bağları hudûdunda vâki‘ bir tarafı benim tarlam ve bir tarafı Mustafa Bey nâm bevvâbü’s-sultânî bağı ve bir tarafı dahi Solakzâde İsmail Çelebi bağı ve bir tarafı tarîk-i âm ile mahdûd tahmînen beş dönüm mülk bağımı müşârun ileyh Ali Bey’e on üç bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm ve kabz eyledikden sonra semeni olan meblağ-ı mârrü’z-zikr on üç bin mezbûrü’n-na‘t akçeyi yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan bağ mersûm Ali Bey’in mülk-i müşterâsıdır keyfe mâ yeşâ ve yehtâr mutasarrıf olsun dedikde bâyi‘-i mezbûr Ali Bey’i ikrâr-ı meşrûhunda vekîl-i mersûm Cafer Bey bi’l-müvâcehe tasdîk ve bi’l-müşâfehe tahkīk ettikde mâ-hüve’l-vâkı‘ gıbbe’t-taleb ketb olundu. Hurrire fî evâsıtı şehri Rebî‘i’s-sânî li-sene isneteyn ve sittîn ve elf. Şühûdü’l-hâl: Mahmud Efendi b. Mehmed, Mehmed Çelebi b. Mahmud, el-Hâc Mehmed b. ( ). Piyâle Bey b. Abdullah, Mahmud Çelebi b. Ahmed, Mehmed Çelebi b. Hasan, Ali Çelebi b. Cafer, Ahmed b. Mehmed ve gayruhüm.