Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 118 Hüküm no: 110 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu İstorofoz v. Tarandafilo evini Kasım b. Musa’ya sattığı Kuyumcu tâifesinden İstorofoz v. Tarandafilo mahfil-i kazâda işbu sâhibü’l-kitâb Kasım b. Musa nâm kimesne muvâcehesinde ikrâr ve i‘tirâf edüp Beşiktaş’a tâbi‘ Kuruçeşme nâm karyede vâki‘ bir tarafı Sarı Ali mülkü ve bir tarafı Yamandi ve bir tarafı cebel ve bir tarafı tarîk-i âm ile mahdûd ulvî ve süflî iki bâb beyti ve tahta-pûş ve kenîfi müştemil zevcem Vasilici nâm zimmiyye hibe eylediği menzilimi [33b] sâlifü’z-zikr Kasım’a sekiz bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm mülk-i müşterâsıdır keyfe mâ yeşâ ve yehtâr mutasarrıf olsun deyicek bâyi‘-i merkūmu ikrâr-ı meşrûhunda müşterî-i mersûm Kasım bi’l-müvâcehe tasdîk ve bi’l-müşâfehe tahkīk ettikde mâ-vaka‘a ketb olundu. Fî evâsıtı şehri Rebî‘i’s-sânî li-sene isneteyn ve sittîn ve elf. Şühûdü’l-hâl: Muslu Beşe b. Mehmed, Mustafa b. Mehmed, Mustafa Efendi b. Ali, Hasan Ağa b. ( ), İsmail Beşe b. Hasan, Mehmed Beşe b. Şaban, Mehmed Beşe b. ( ) ve gayruhüm mine’l-hâzırîn.