Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 119 Hüküm no: 111 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Çelebi b. Mehmed’in evini Mehmed Çelebi b. Musa’ya sattığı Mahmiye-i Galata muzâfâtından kasaba-i Beşiktaş’da Cihânnümâ mahallesinde sâkin Murad Çelebi b. Mehmed el-bevvâbü’s-sultânî mahfil-i kazâda işbu sâhibü’l-kitâb Mehmed Çelebi b. Musa er-râcil muvâcehesinde bi-tav‘ihî ikrâr ve i‘tirâf edüp mahalle-i mezbûrede vâki‘ bir tarafı Süleyman Bey ve bir tarafı Külhâncı Ali mülkü ve bir tarafı Emetullah Hatun mülkü ve bir tarafı tarîk-i âm ile mahdûd iki fevkānî odayı ve tahta-pûşu ve bir mahzeni ve eşcâr-ı müsmire ve gayr-i müsmireyi ve kenîfi müştemil mülk menzilimi cümle tevâbi‘ ve levâhıkı ile iki yüz altmış nakd tâmmü’l-vezn ve kâmilü’l-ayâr riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm ve kabz eyledikden sonra meblağ-ı merkūm iki yüz altmış guruşu yedinden bi’t-tamâm ahz u kabz eyledim keyfe mâ yeşâ ve yehtâr mutasarrıf olsun deyicek bâyi‘-i mezbûr Murad Çelebi’yi ikrâr-ı meşrûhunda müşterî-i mersûm Mehmed Çelebi bi’l-müvâcehe tasdîk ve bi’l-müşâfehe tahkīk edicek mâ-vaka‘a ketb olundu. Hurrire fî-evâsıtı şehri Rebî‘i’s-sânî li-sene isneteyn ve sittîn ve elf. Şühûdü’l-hâl: Mustafa Çelebi b. Şaban, Cafer Bey b. Perviz, Halil Çelebi b. Cafer, Ahmed Ağa b. Mehmed, Mehmed Çelebi b. Hüseyin, Mustafa Bey b. Mehmed, Mustafa Çelebi b. Kenan Yesârî ve gayruhüm.