Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 123 Hüküm no: 118 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğlence Hatun bt. Abdullah’ın evini el-Hâc Hüseyin Bey b. Hasan’a sattığı Mahmiye-i Galata muzâfâtından kasaba-i Beşiktaş’da Sinan Paşa-yı Cedîd mahallesinde sâkine Eğlence bt. Abdullah nâm Hatun tarafından menzil-i âti’l-beyânı bey‘a vekîl olup mezbûreyi ma‘rifet-i şer‘iyye ile ârifân olan Mahmud Efendi b. Mehmed ve Mehmed Çelebi b. Mahmud nâm kimesneler şehâdetleriyle şer‘an vekâleti sâbite olan zevci Sefer Reis b. Mustafa nâm kimesne meclis-i şer‘de işbu sâhibü’l-kitâb el-Hâc Hüseyin Bey b. Hasan muvâcehesinde ikrâr edüp müvekkilem mezbûrenin mahalle-i mezbûrede vâki‘ ma‘lûmü’l-hudûd fevkānî bir bâb odayı ve bir sofayı ve bi’r-i mâyı ve eşcâr-ı müsmire ve gayr-i müsmire hadîkayı hâvî menzilini merkūm el-Hâc Hüseyin Bey’e on iki bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edüp ol dahi iştirâ ve tesellüm ve kabz eyledikden sonra semeni olan meblağ-ı mersûm on iki bin mezbûrü’n-na‘t akçeyi ahz u kabz eyledi ba‘de’l-yevm mülk-i müşterâsıdır keyfe mâ yeşâ ve yehtâr mutasarrıf olsun deyicek gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’l-hâdî aşer min-Cumâdelâhire li-sene isneteyn ve sittîn ve elf. Şühûdü’l-hâl: El-Hâc Osman Usta, Veli Usta, Mustafa Çelebi b. Süleyman, Ebûbekir Çelebi, Abdülkerim Efendi el-İmâm, Ali Çelebi b. Cafer, Cafer b. ( ) ve gayruhüm.