Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 123 Hüküm no: 117 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa bostancılardan Mehmed b. Hızır’ın evini ve cariyesi Gülistan’ı Mehmed Beşe b. Ahmed’e sattığı Hâssa bostancılardan Mehmed b. Hızır meclis-i şer‘de işbu hâfızü’l-vesîka diğer Mehmed Beşe b. Ahmed muvâcehesinde ikrâr ve i‘tirâf edüp mahmiye-i Galata muzâfâtından kasaba-i Beşiktaş’da vâki‘ Sultân Süleyman Hân tâbe serâhû mahallesinde vâki‘ silk-i mülk-i sahîhimde münselik bir tarafı Mehmed b. ( ) ve bir tarafı Veli Beşe ve bir tarafı Seru nâm hatun mülkleri ve bir tarafı bazen hadîka-i hâssa ve bazen tarîk-i âm ile mahdûd tahtânî bir bâb beyti ve önünde cüneyne ve muhavvata ve bahçe ve kenîfi müştemil mülk menzilimi cümle tevâbi‘ ve levâhıkı ile mezbûr Mehmed Beşe’ye üç bin yüz akçe kıymetli Efrenciyyü’l-asl Gülistan nâm bir câriye ile üç bin iki yüz nakd-i râyic fi’l-vakt akçeye ki cem‘an altı bin üç yüz akçeye tarafeynden emr ve kabûlü hâvî beyt-i bâtt-ı sahîh-i şer‘î ile bey‘ ve teslîm edüp ol dahi iştirâ ve kabz ve tesellüm eyledikden sonra semeni olan meblağ-ı mezbûr altı bin üç yüz akçeyi bi’t-tamâm ve’l-kemâl yedinden ahz u kabz eyledim ba‘de’l-yevm mülk-i müşterâsıdır keyfe mâ yeşâ ve yehtâr mutasarrıf olsun deyicek bâyi‘-i merkūmu ikrâr-ı meşrûhunda müşterî-i mersûm bi’l-müvâcehe tasdîk ve bi’l-müşâfehe tahkīk edicek mâ-vaka‘a ketb olundu. Hurrire fi’l-yevmi’l-âşir min-Cumâdelûlâ li-sene isneteyn ve sittîn ve elf. Şühûdü’l-hâl: Mustafa Efendi el-İmâm, Ahmed Ağa b. Abdullah, Mehmed Çelebi el-Müezzin, Osman b. Nasûh, Mehmed Çelebi b. Mehmed, Hasan b. Mustafa, Mehmed b. Abdülkerim, Kasım b. Mehmed ve gayruhüm.