Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 124 Hüküm no: 120 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdullah’ın evini çocukları Mehmed Çelebi ile Fâtıma Hatun’a hibe ettiği Mahmiye-i Galata muzâfâtından kasaba-i Beşiktaş’da vâki‘ Sinanpaşa mahallesinde sâkine Âişe Hatun bt. Abdullah meclis-i şer‘de işbu sâhibü’l-kitâb sadrî kebîr oğlu Mehmed Çelebi ve kebîre kızı Fâtıma Hatun muvâcehelerinde bi’t-tav‘ ve’r-rızâ ikrâr ve i‘tirâf edüp silk-i milk-i sahîhimde münselik olup mahalle-i mezbûrede vâki‘ bir tarafı merhûm Kapudan Hasan Paşa binâ eylediği zindân ve bir tarafı Fâtıma Hanım mülkü ve bir tarafı Hadice Hatun mülkü ve bir tarafı tarîk-i âm ile mahdûd fevkānî iki bâb beyti ve tahta-pûşu ve bir sofayı ve yine tahtânî iki bâb beyti ve sofayı ve bi’r-i mâyı ve kenîfi ve yine tarîk-i âm cânibine müşrif fevkānî iki bâb beyti ve altında kârgîr bir bâb mahzeni ve arsa ve kenîfi müştemil mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile ba‘de’t-tahliyeti’ş-şer‘iyye oğlum mezbûr Mehmed Çelebi ile kızım ve kerîmem merkūme Fâtıma Hatun’a şerâitini câmi‘ hibe-i sahîha-i şer‘iyye ile hibe ve teslîm ve temlîk edüp onlar dahi meclis-i hibede ittihâb ve temellük ve kabz eylediklerinden sonra mukābele-i hibede herbirleri birer Mushaf-ı şerîf ta‘vîz edüp ol dahi ta‘avvuz ve kabûl ve kabz eyledikden sonra zikr olunan tarîk-i âm cânibinde vâki‘ olan fevkānî iki beyt ile tahtânî bir mahzen ve nişân vaz‘ olunan hacer cânibine dek arsa-i mersûme Fâtıma Hatun hissesine ta‘yîn ve tahsîs olunup mâ‘adâsı Mehmed Çelebi’nin olmak üzere bu hurûf ber-sebîl-i temessük ketb olundu. Fi’l-yevmi’l-âşir min-Cumâdelûlâ li-sene isneteyn ve sittîn ve elf. Şühûdü’l-hâl: Musa Bey b. Yusuf Bey Mirlivâ, Ahmed Çelebi b. Mehmed, Mustafa Çelebi b. Hasan el-Cündî, Mehmed Çelebi, Mehmed b. Ömer, Usta Ali Berber, Mustafa Çelebi b. Hasan, Receb b. Abdullah.