Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 129 Hüküm no: 128 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Menahim v. Avram’ın bağını İstarola bt. Avraham’a sattığı Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden olup Portakal cemâ‘atinden Menahim v. Avraham nâm Yahudi meclis-i şer‘-i hatîr-i lâzımü’t-tevkīrde işbu râfi‘atü’s-sifr İstarola bt. Avraham nâm Yahudiye tarafından menzil-i âti’z-zikri iştirâya ve semenini def‘ ve teslîme nehc-i mu‘teber-i şer‘î üzere vekîl olan zevci Liyaho v. Mosi nâm Yahudi muvâcehesinde bi-tav‘ihî ikrâr ve takrîr-i kelâm edüp karye-i mezbûre bağları hudûdu dâhilinde vâki‘ bir tarafı merhûm Yahya Efendi’nin vakıf tarlası ve bir tarafı Kaya Sultan tarlası ve bir tarafı Derviş nâm Ermeni bağı ve bir tarafı tarîk-i âm ile mahdûd olup merhûm Sultân Bayezid Hân tâbe serâhû vakfına senede elli altı akçe mukāta‘a-i zemîni olan tahmînen yedi dönüm mikdârı mülk bağımı vekîl-i mezbûr Liyaho’ya iki yüz altmış kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi bi’l-vekâle iştirâ ve tesellüm ve kabz eyledikden sonra semeni olan meblağ-ı mârrü’z-zikr iki yüz altmış aded riyâli vekîl-i merkūm Liyaho yedinden bi’t-tamâm ve’l-kemâl ahz u kabz eyledim ba‘de’l-yevm sâlifü’z-zikr bağ [38b] mersûme İstarola’nın mülk-i müşterâsı ve hakk-ı sırfıdır keyfe mâ teşâ ve tehtâr sâir emlâki gibi mutasarrıfe olsun dedikde mukırr-ı mezbûr Menahim’in vech-i meşrûh üzere cârî ve sâdır olan ikrârını vekîl-i mezbûr Liyaho bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-hâmis ve’l-ışrîn min-Cumâdelûlâ li-sene isneyn ve sittîn ve elf. Şühûdü’l-hâl: Arslan Beşe b. Hasan, Mehmed Beşe b. Hasan, Ahmed Beşe b. Himmet, Receb Beşe b. Himmet, Mustafa b. Mehmed, Cafer b. mezbûr, Mehmed b. Ramazan Muhzır, Derviş b. Ramazan ve gayruhüm. Zafiri v. Kostantin, Nikola v. el-mezbûr, İsrail v. Yako, Yako v. Yayasi?, İsak v. David.