Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 128 Hüküm no: 127 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Mehmed’in boşandığı hanımı Ayşe Hatun bt. Abdullah’da olan alacağını sulh yoluyla aldığı Mahmiye-i Galata’ya tâbi‘ kasaba-i Beşiktaş mahallâtından Maçka mahallesi sâkinlerinden Mustafa Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde zevce-i mutallakası işbu sâhibetü’l-kitâb Âişe Hatun bt. Abdullah muvâcehesinde takrîr-i kelâm ve ta‘bîr ani’l-merâm edüp bundan akdem merkūme Âişe Hatun’un mahalle-i mezbûrede vâki‘ ma‘lûmü’l-hudûd mülk menzilinin meremmâti’çün emri ile kendi [38a] malımdan iki bin beş yüz akçe harc ve sarf eylemiş idim. Hâlâ beynimizde müfârakat vâki‘ olmağın meblağ-ı mezkûru mersûme Âişe Hatun’dan taleb eylediğimde bazısını vermeğe râzı olup ve bazısını vermemekle beynimizde münâza‘ât-ı kesîre vâkı‘a olmuş idi. El-hâletü hâzihî beynimize muslihûn tavassut edüp zikr olunan meremmât akçesini bin beş yüz akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mârrü’z-zikr bin beş yüz akçeyi yedinden ahz u kabz eyleyüp meblağ-ı bâkī bin akçe da‘vâsından zimmetini ibrâ-i âmm-ı kātı‘ü’n-nizâ‘ ile ibrâ ve ıskāt eyledim ba‘de’l-yevm meblağ-ı bâkī bin akçe için kendim bizzât veya bi’l-vekâle da‘vâ sudûr ederse lede’l-hükkâmi’l-kirâm mesmû‘a ve makbûle olunmaya dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâdis ve’l-ışrîn min-Cumâdelûlâ li-sene isneyn ve sittîn ve elf. Şühûdü’l-hâl: Şuhûdü’s-sâbıkūn.