Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 130 Hüküm no: 131 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun bt. Yakub’dan çocuklarına intikal eden evin Kokoya bt. Yorgaki’ye satıldığı Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karyede sâkine iken müteveffât olan Saliha Hatun bt. Yakub’un verâseti zevc-i metrûkü Ahmed Bey’e ve sadrî sagīr oğlu Mehmed ve sagīre kızı Âişe’ye münhasıra olduğu şer‘an mütehakkık ve zâhir oldukdan sonra sagīrân-ı mezbûrânın tesviye-i umûrlarına vasiyy-i mansûbları olmağla mezbûre Saliha’dan irs-i şer‘î ile sagīrân-ı mersûmâna intikāl eden menzil-i âti’l-beyâna vaz‘-ı yed eden merkūm Ahmed Bey mahfil-i kazâda Koko[ya] bt. Yorgaki muvâcehesinde bi’l-vesâye ikrâr ve takrîr-i kelâm edüp karye-i mezbûrede vâki‘ ma‘lûmü’l-hudûd tahtânî iki bâb odayı ve kenîfi müştemil irs-i şer‘î ile sagīrân-ı mezbûrâna intikāl eyleyen menzil zarûret-i deyn ve nafakaları için fürûht olunmak lâzım gelmeğin gıbbe’l-izni’ş-şer‘î müzâyede olunup yetmiş sekiz guruşda merkūme Kokoya üzerinde karâr edüp âhar tâlibi olmamağın vesâyetim hasebiyle meblağ-ı mersûm yetmiş sekiz guruşa bey‘ ve teslîm edüp kabz-ı semen-i merkūm eyledim ba‘de’l-yevm mülk-i müşterâsıdır keyfe mâ teşâ mutasarrıfe olsun deyicek gıbbe’t-tasdîki’ş-şer‘î vicâhen mâ-vaka‘a ketb olundu. Hurrire fî-evâsıtı Cumâdelûlâ li-sene isneyn ve sittîn ve elf. Şühûdü’l-hâl: Mehmed Bey el-Cündî, Süleyman Bey b. ( ), Mehmed Beşe b. ( ), Hüseyin Beşe b. Mehmed.