Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 131 Hüküm no: 132 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hânım bt. Cafer Bey’in Nemçe asıllı kölesi Şimon v. Petro’ya Anton v. Kaloriz, Casimo v. Pertonime ve Ancelo v. Martomi’nin kefil oldukları Mahmiye-i Galata muzâfâtından kasaba-i Beşiktaş’da sâkin Anton v. Kaloriz ve mahmiye-i mezbûreye tâbi‘ kasaba-i Kasımpaşa’da Parmakkapı’da sâkin Casimo v. Pertonime ve Ancelo v. Martomi nâm zimmîler meclis-i şer‘-i hatîr-i lâzımü’t-tevkīrde kasaba-i mezbûre mahallâtından Sinanpaşa mahallesi sâkinelerinden fahrü’l-muhadderât Âişe Hânım bt. Cafer Bey tarafından husûs-ı âti’l-beyânı kabûl ve tasdîka vekîl olup Ahmed Çelebi b. Mehmed ve el-Hâc Selim b. Abdullah nâm kimesneler şehâdetleri ile şer‘an vekâleti sâbite olan vardiyânbaşıları işbu râfi‘ü’l-kitâb el-Hâc Ali b. Ahmed nâm kimesne muvâcehesinde her biri ikrâr ve i‘tirâf edüp merkūme Âişe Hânım’ın esîrlerinden olup işbu hâzır bi’l-meclis uzun boylu gök elâ gözlü açık kaşlı sarışın [39b] iki bin kıt‘a riyâlî guruş-ı kebîr kıymetli Nemçeviyyü’l-asl Şimon v. Petro nâm esîr mâdâmki âl-i Osmân halledallâhu hilâfetehum hazretlerinin taht-ı hükûmetlerinde olan vilâyetlerde bilâ-hadîd yürüyüp ve eğer bilâd-ı İslâmî’de dahi bazı hisâr altlarına varılırsa yine bilâ-hadîd yürümek üzere evvelen her birimiz nefsine ve sâniyen firâr edüp gaybet-i münkatı‘a ile gaybet ederse kıymeti olan sâlifü’z-zikr iki bin kıt‘a riyâli her birimiz kendi malımızdan ale’s-seviyye edâya emrü kabûlü hâvî kefâlet-i sahîha-i şer‘iyye ile kefîl olduk dediklerinde vekîl-i mezbûr el-Hâc Ali dahi kefâlet-i merkūmeyi kabûl ve vech-i meşrûh üzere olan kelâmlarını tasdîk etmeğin mâ-vaka‘a bi’t-taleb ketb olundu. Tahrîren fî-gurreti Cumâdelâhire li-sene isneyn ve sittîn ve elf. Şühûdü’l-hâl: Musa Bey b. Cafer Bey, Bayram Ağa b. Abdülmennan, diğer Bayram Ağa b. Abdullah, Mehmed Çelebi b. el-Hâc Mahmud, Mustafa Beşe b. Mehmed, Cafer b. Mehmed, Mehmed b. Ramazan ve gayruhüm.