Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 133 Hüküm no: 136 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro v. Dimitri’nin bağını İstati v. Rizo’ya sattığı Mahmiye-i Galata’ya tâbi‘ Yeniköy nâm karye sâkinlerinden Petro v. Dimitri nâm zimmî meclis-i şer‘-i hatîr-i lâzımü’t-tevkīrde işbu râfi‘ü’s-sifr İstati v. Rizo nâm zimmî muvâcehesinde bi-tav‘ihî ikrâr ve takrîr-i kelâm edüp mahmiye-i mezbûre muzâfâtından kasaba-i Beşiktaş bağları sınırı dâhilinde Kaldırım nâm mevzi‘de vâki‘ bir tarafı Manol nâm zimmî tarlası ve bir tarafı Hristoskoli v. Yamandi nâm zımmî bağı ve bir tarafı Anastaş v. Anton nâm zimmî bağı ve bir tarafı tarîk-i âm ile mahdûd tahmînen on dönüm mikdârı mülk bağımı mezbûr İstati’ye seksen beş kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm ve kabz eyledikden sonra semeni olan meblağ-ı mezkûr seksen beş kıt‘a riyâlî guruşu yedinden bi’t-tamâm ve’l-kemâl ahz u kabz eyledim ba‘de’l-yevm sâlifü’z-zikr bağ merkūm İstati’nin mülk-i müşterâsı ve hakk-ı sırfıdır keyfe mâ yeşâ ve yehtâr sâir emlâki tasarrufu gibi mutasarrıf olsun dedikde mukırr-ı mezbûr Petro’nun vech-i muharrer üzere cârî ve sâdır olan ikrârını el-mukarru lehü’l-merkūm İstati bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min-Cumâdelâhire li-sene isneyn ve sittîn ve elf. Şühûdü’l-hâl: Mehmed Çelebi b. Mustafa, Ahmed Beşe b. Mehmed, Mahmud Çelebi b. Mehmed, Mustafa Beşe b. Mehmed, Mehmed Beşe b. Ramazan, Cafer el-Muhzır ve gayruhüm. Papa Yani v. Nikola, Dimo v. Ferandayi, Ramiri v. Nikola, Yorgi v. Kostantin, Nikola v. Dimo, Papa Yermanoz v. Yani, Yanaki v. Kozma, Dimo v. Yani, Manoli v. Kondi, Aleks v. Yorgi.