Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 136 Hüküm no: 142 Orijinal metin no: [42a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Osman’ın Süheyl Bey’in nukud vakfından istiğlâl yoluyla ödünç para aldığı Mahmiye-i Galata muzâfâtından Beşiktaş kasabası mahallâtından Sinanpaşa mahallesinde sâkine Âişe bt. Osman nâm hatun meclis-i şerî‘at-i şerîfe-i garrâ ve mahfil-i tarîkat-i refî‘a-i zehrâya hâzıra olup işbu akdin kendilerinden sudûruna kadar mâliki olduğu ve taht-ı tasarrufunda bulundurduğu, mahalle-i mezbûrede kâin, hudûdu bir tarafından Mehmed Çelebi b. el-Hâc Mahmud mülkü, diğer taraflarından tarîk-ı âm ile mahdûd bulunan, tahtânî ve fevkānî ikişer bâb hâneyi, arsa-i hâliyeyi ve kenîfi müştemil olan cemî‘ menzilini cümle tevâbi‘i ve levâhıkıyla râyicü’l-vakt elli riyâlî guruş semen-i mu‘ayyen-i makbûzla bundan akdem mahmiye-i mezbûre muzâfâtından Tophane kasabası tevâbi‘inden Mehmed Ağa mahallesinde sâkin iken fevt olan sâhibü’l-hayrât Süheyl Bey’in nukūd vakfına mütevellî olan hâmil-i hâze’l-kitâb Mustafa Bey b. Perviz’e îcâb ve kabûl hâvî bey‘ ile bey‘ eylediğini ikrâr etti. Mezbûr Mustafa Bey de vakf-ı mezbûr malıyla ve istiğlâl maksadıyla menzil-i merkūmu iştirâ etti. Bâyi‘a-i mezbûrenin istîcârı üzere mütevellî-i mezkûr zeyl-i vesîkada muharrer târîhden bir sene tamâmına yedi buçuk riyâlî guruş ücret-i kirâ ile menzil-i mezkûru kendisine icâreye verdi. Vâki‘ ikrâr mütevellî-yi mezbûr tarafından vicâhen ve şifâhen tasdîk edildi. Cerâ zâlike ve hurrire fî-gurreti Cemâziyelâhire li-sene isneteyn ve sittîn ve elf. Şühûdü’l-hâl: Mehmed Efendi b. Yusuf Efendi, Mehmed Çelebi b. Abdurrahman, Hüseyin Çelebi b. Perviz, el-Hâc Mustafa b. Ya‘kūb, Yusuf Beşe b. Mahmud, Mustafa Beşe b. Mehmed, Mehmed Çelebi b. Mahmud ve gayrühüm