Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 135 Hüküm no: 141 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan b. Mustafa ile hanımı Hanzâde bt. Hızır’ın Sivrihisar’ın Kapılı köyündeki mülklerini Ali b. Ramazan’a sattıkları Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinlerinden Ramazan b. Mustafa nâm kimesne asâleten ve zevcesi Hanzâde bt. Hızır nâm hatun tarafından vekâleten mahfil-i kazâda işbu sâhibü’l-kitâb Ali b. Ramazan muvâcehesinde ikrâr ve takrîr-i kelâm edüp vilâyet-i Anadolu’da Sivrihisâr kazâsına tâbi‘ Kapılı nâm karyede vâki‘ bir tarafı Mehmed Çelebi mülkü ve bir tarafı mezbûr Ali mülkü ve iki tarafı tarîk-i âm ile mahdûd iki bâb tahtânî odamı ve yine karye-i mezbûrede vâki‘ ma‘lûmü’l-hudûd mülk bağımı ve vekîli olduğum zevcem mezbûrenin bir göz Sakarya suyu ile dâir mülk değirmenini dahi safka-i vâhide ile mezbûr Ali’ye sekiz bin iki yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm eyledikden sonra semen-i mezkûrdan dört yüz akçesin ahz u kabz edüp meblağ-ı bâkī yedi bin sekiz yüz akçemizi târih-i kitâbdan yüz seksen gün tamâmına değin edâ etmek üzere müeccel ve mev‘ûddur deyicek bâyi‘-i mezbûrun ikrâr-ı meşrûhunda müşterî-i mezbûr bi’l-müvâcehe tasdîk etmeğin mâ-vaka‘a bi’t-taleb ketb olundu. Tahrîren fi’l-yevmi’l-ışrîn Cumâdelâhire li-sene 1062 Şühûdü’l-hâl: Mahmud b. Ali Halîfe, Himmet Efendi, Ali b. Salih, Yusuf Dede b. Cafer, Mustafa Beşe b. Mahmud Muhzır, Mehmed b. Ramazan.