Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 139 Hüküm no: 149 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salamon v. Benyami, Yako v. Salamon ve Panayot v. Yorgi’nin bağlarını Mustafa Çelebi b. İsmail’e sattıkları Mahmiye-i Galata muzâfâtından kasaba-i Beşiktaş’a tâbi‘ Ortaköy nâm karye sâkinlerinden olup Alman cemâ‘atinden Salamon v. Benyami ve yine karye-i mezbûrede sâkin cemâ‘at-ı mezbûreden Yako v. Salamon ve yine karye-i mezbûrede sâkin zimmî tâifesinden Panayot v. Yorgi mahfil-i kazâ ve mahall-i irtizâda işbu hâfızü’l-kitâb umdetü’l-a‘yân Mustafa Çelebi b. İsmail tarafından ikrâr-ı âti’l-beyânı tasdîka vekîl olup vekâleti hasm-ı şer‘î-i câhid mahzarında Fazlullah Çelebi b. Hasan ve el-Hâc Ahmed Çelebi b. Mehmed şehâdetleri ile şer‘an vekâleti sâbite olun mefharü kuzâti’l-islâm Ebussuûd Çelebi b. Osman muvâcehesinde her biri ikrâr ve takrîr-i kelâm edüp silk-i mülk-i sahîhimizde münselik [44b] karye-i mezbûre bağları hudûdu dâhilinde vâki‘ mevzi‘-i vâhidede üç kıt‘a bağımızın ki bir tarafları Hasan Çelebi b. Muslu er-râcil bağı ve iki tarafları Yasef bağı ve bir tarafları dahi vâdi-i tarîk-i âm ile mahdûddur zikr olunan üç kıt‘a bağlarımızı safka-i vâhide ile bin dört yüz tâmmü’l-vezn ve kâmilü’l-ayâr riyâlî guruş-ı kebîre müşârun ileyh Mustafa Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm ve kabz eyledikden sonra semeni olan meblağ-ı mezkûr bin dört yüz mezbûrü’n-na‘t guruşu merkūm Mustafa Çelebi yedinden bi’t-tamâm ve’l-kemâl ahz u kabz eyledik min-ba‘d bir akçe ve bir habbe hakkımız kalmadı keyfe mâ yeşâ ve yehtâr mutasarrıf olsun dediklerinde bâyi‘ûn-ı merkūmûnu ikrâr-ı meşrûhunda vekîl-i müşârun ileyh mezbûr Ebussuûd Çelebi bi’l-müvâcehe tasdîk ve bi’l-müşâfehe tahkīk edicek sıhhat-i bey‘ u şirâya hüküm birle işbu hurûf ketb olundu. Tahrîren fi’s-sâmin ve’l-ışrîn min-Cumâdelâhire li-sene isneyn ve sittîn ve elf. Şühûdü’l-hâl: Fahrü’l-akrân Ali Ağa Serbevvâbân, Mahmud Efendi el-İmâm, Mustafa Çelebi b. İbrahim, Ebûbekir Çelebi el-Müezzin, Hüseyin Çelebi el-Kâtib, Arslan Beşe b. Hasan, Receb Beşe b. Keyvan, Mustafa b. Mehmed ve gayruhüm.