Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 139 Hüküm no: 148 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Badıyeldan bt. Abdullah ile kızı Fâtıma bt. Mehmed Çelebi’nin Yanaki v. Anderya zimmetinde alacakları olduğunu iddia etmeleri Mahmiye-i Galata muzâfâtından kasaba-i Beşiktaş’a tâbi‘ Arnavud nâm karyede sâkin iken bundan akdem vefât eden Mehmed Çelebi’nin zevce-i metrûkesi Bâdıyeldân bt. Abdullah ve kebîre kızı Fâtıma nâm hatunlar taraflarından husûs-ı âti’l-beyânı da‘vâya nehc-i mu‘teber-i şer‘î üzere vekîl olan mezbûre Fâtıma’nın zevci işbu râfi‘ü’l-kitâb es-Seyyid Ali Çelebi b. es-Seyyid Abdülhâlık mahfil-i kazâda Yanaki v. Anderya nâm zimmî muvâcehesinde bi’l-vekâle ikrâr ve takrîr-i kelâm edüp müvekkiletân-ı mezbûretânın merkūm Yanaki zimmetinde cihet-i karz-ı şer‘îden yetmiş kıt‘a riyâlî guruş-ı kebîr hakları olup hâlâ meblağ-ı mezkûru taleb ederim dedikde gıbbe’s-suâl mezbûr Yanaki cevâbında benim ancak yirmi beş kıt‘a riyâlî guruş deynim vardır deyü ikrâr mâ‘adâyı inkâr eyledikde müdde‘î-i mezbûrdan da‘vâsına muvâfık beyyine taleb olundukda ol dahi ityân-ı beyyine için istimhâl edicek mehl-i şer‘î ile imhâl olundukdan sonra ikrârı mertebesi olan meblağ-ı mezkûru edâya tenbîh birle işbu hurûf ketb olundu. Tahrîren fi’l-yevmi’s-sâmin aşer min-Cumâdelâhire li-sene isneyn ve sittîn ve elf. Şühûdü’l-hâl: Abdülbâkī Çelebi b. Abdülmennan, Ömer Çelebi b. Hüseyin, Mustafa Beşe b. Mehmed, Mehmed b. Ramazan Muhzır, Mehmed Çelebi b. Mahmud, Ali b. Hızır.