Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 140 Hüküm no: 151 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Reis b. Abdullah’ın Kiryaki v. Lefteri’deki alacağının anlaştıkları miktarını alması ve kalan meblağın ispatı için de kendisine mühlet verilmesi Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karye sükkânından işbu râfi‘ü’l-kitâb Mustafa Reis b. Abdullah nâm kimesne meclis-i şer‘-i hatîr-i lâzımü’t-tevkīrde yine karye-i mezbûrede sâkin Kiryaki v. Lefteri nâm zimmî muvâcehesinde üzerine da‘vâ ve takrîr-i kelâm edüp merkūm Kiryaki zimmetinde cihet-i deyn-i şer‘îden iki bin altı yüz elli akçe hakkım olup taleb eylediğimde vermede ta‘allül eder suâl olunup alıverilmesi murâdımdır dedikde gıbbe’s-suâl mezbûr Kiryaki cevâbında müdde‘î-i mezbûr Mustafa Reis’e ancak iki bin yüz elli akçe deynim vardır deyü ikrâr mâ‘adâyı inkâr eyledikde mersûm Mustafa Reis’den meblağ-ı bâkī beş yüz akçe dahi mezbûr Kiryaki zimmetinde olduğuna beyyine taleb olundukda ol dahi ityân-ı beyyine için istimhâl edicek mehl-i şer‘î ile imhâl olundukdan sonra ikrârı mertebesi olan meblağ-ı mezkûr iki bin yüz elli akçeyi müdde‘î-i merkūm Mustafa Reis’e edâ ve teslîm eylemeğe mezbûr Kiryaki’ye tenbîh birle [45a] mâ-vaka‘a bi’t-taleb ketb olunup yed-i tâlibe def‘ [ve] vaz‘ olundu. Tahrîren fi’l-yevmi’s-sâdis min-şehri Recebi’l-ferd li-sene isneyn ve sittîn ve elf. Şühûdü’l-hâl: Mehmed Beşe b. Ahmed, Mehmed Çelebi b. Mahmud, Cafer Beşe b. Mehmed, Mustafa Beşe b. Mehmed, Mehmed Muhzır-ı havâle ve gayruhüm.