Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 144 Hüküm no: 157 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Receb’in Hasankeyf köyündeki bahçesini Mustafa b. Hüseyin’e sattığı Mahmiye-i Galata’ya tâbi‘ kasaba-i Beşiktaş’da Sinanpaşa mahallesi sâkinlerinden Hüseyin b. Receb tarafından bey‘-i âti’l-beyânı ikrâra vekîl olup Mahmud Reis b. Mehmed ve İsmail b. Zekeriya nâm kimesneler şehâdetleri ile şer‘an vekâleti sâbite olan Hasan b. Mehmed nâm kimesne mahfil-i kazâda işbu râfi‘ü’l-kitâb Mustafa b. Hüseyin nâm kimesne muvâcehesinde bi’l-vekâle ikrâr ve takrîr-i kelâm edüp vilâyet-i Anadolu’da Keşab kazâsına tâbi‘ Hasankeyf nâm karyede Kâfiroğlu demekle ma‘rûf mevzi‘de vâki‘ bir tarafı Hızıroğlu mülkü ve bir tarafı [46b] Vefâzet mülkü ve iki pınar ayağı ile mahdûd eşcâr-ı müsmire ve gayr-i müsmireyi muhtevî mülk bahçesini müvekkilim mezbûr Hüseyin mezbûr Mustafa’ya altı yüz kırk akçeye bey‘-i kat‘î ile bey‘ ve teslîm edüp ol dahi iştirâ ve tesellüm eyledikden sonra semen-i mezkûru yedinden bi-tamâmihî ahz u kabz eyledi ba‘de’l-yevm bahçe-i mezkûr mezbûr Mustafa’nın mülk-i müşterâsıdır keyfe mâ yeşâ ve yehtâr mutasarrıf olsun dedikde vekîl-i mezbûrun vech-i muharrer üzere cârî ve sâdır olan ikrârını mezbûr Mustafa bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâdis aşer min-şehri Recebi’l-ferd li-sene isneyn ve sittîn ve elf. Şühûdü’l-hâl: Hüseyin Ağa b. Behram, Süleyman Beşe b. Halil, Hasan b. İsa, Mustafa Beşe [b.] Mehmed, Cafer b. mezbûr.