Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 143 Hüküm no: 156 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Abdullah’ın Mustafa Usta b. Yusuf’a 4500 akçe borcu olduğunun tescili Mahmiye-i Galata hâricinde Kürkçükapı’sında sâkin Mustafa Beşe b. Abdullah nâm kimesne meclis-i şer‘-i hatîr-i lâzımü’t-tevkīrde işbu sâhibü’l-kitâb fahrü’l-akrân Mustafa Usta b. Yusuf tarafından husûs-ı âti’z-zikri tasdîka vekîl olup Yahya Çelebi b. Nasûh ve Bayram Beşe b. Veli nâm kimesneler şehâdetleri ile şer‘an vekâleti sâbite olan Hüseyin Beşe b. Hasan mahzarında ikrâr ve i‘tirâf edüp bundan akdem müşârun ileyh Mustafa Usta’dan bi-tarîki’l-karz dört bin beş yüz nakd-i râyic fi’l-vakt fıddî akçe istikrâz eyleyüp hâlâ meblağ-ı mezkûr zimmetimde lâzımü’l-edâ ve vâcibü’l-kazâ müşârun ileyh Mustafa Usta’ya deynimdir deyü bi-tav‘i’s-sâf ikrâr ve i‘tirâf eylemeğin işbu hurûf ber-sebîl-i temessük ketb olundu. Tahrîren fi’l-yevmi’s-sânî aşer min-şehri Recebi’l-mürecceb li-sene isneyn ve sittîn ve elf. Şühûdü’l-hâl: Ramazan Beşe b. Receb, el-Hâc Bâli b. Ömer, Mahmud Çelebi b. Mehmed, Ali Çelebi b. Süleyman, Ahmed Ağa b. Sefer, Mustafa Beşe b. Mehmed, Mehmed Çelebi b. Ramazan ve gayruhüm.