Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 145 Hüküm no: 159 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. Dimitri kendisini dövüp yaraladıkları iddiasıyla Mehmed b. Mahmud, İbrahim b. Mehmed ve Kel Mustafa’ya açtığı davayı ispat ettiği Tahakkuk-ı özr-i şer‘î ile zikri âtî husûsun mahallinde istimâ‘ı iltimâs olunmağın küttâb-ı mahkemeden Mevlânâ Ahmed Efendi irsâl olunup ol dahi zeyl-i kitâbda mastûrü’l-esâmî olan cemâ‘at-ı Müslimîn ile mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karye sâkinlerinden Todori v. Dimitri nâm zimmînin menziline varılup akd-i meclis-i şer‘-i şerîf eylediklerinde işbu râfi‘ü’s-sifr mezbûr Todori meclis-i ma‘kūd-ı mezbûrda Mehmed b. Mahmud ve İbrahim b. Mehmed ve gāib ani’l-meclis Kel Mustafa nâm kimesneler muvâcehelerinde üzerlerine da‘vâ ve takrîr-i kelâm edüp târih-i kitâbda[n] iki gün mukaddem karye-i mezbûre iskelesi önünde demir üstünde yatan <<şeytiye ta‘bîr olunur sefînesi>> İbrahim Reis nâm kimesnenin şeytiye ta‘bîr olunur sefînesi yoldaşları ile mezbûr İbrahim Reis [47a] akşama karîb her birinin ellerinde balta ve toyka ile sefîneden çıkıp ben dahi kendi hâlimde durur iken mezbûrûn Mehmed ve İbrahim ve Mustafa beni bilâ-sebeb balta ve toyka ile urup cem‘an a‘zâmı mecrûh eyleyüp hâlâ sâhib-i firâş olmuşumdur suâl olunup ihkāk-ı hak olunması matlûbumdur dedikde gıbbe’s-suâl ve akībe’l-inkâr müdde‘î-i mezbûr Todori’den da‘vâsına mutâbık beyyine taleb olundukda karye-i mezbûre sâkinlerinden İbrahim Beşe b. Kasım ve Osman b. Hüseyin nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr karye-i mezbûrede kendi hâlinde durur iken sefîne-i mezkûre yoldaşları cem‘an ellerinde toyka ve balta ile sefîneden çıkıp ve mezbûr Mehmed’in elindeki balta ile mersûm Todori’yi bilâ-sebeb urup cem‘an a‘zâsını mecrûh eyledi biz bu husûsa minvâl-i muharrer üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde şehâdetleri makbûle oldukdan sonra zeyl-i kitâbda mastûrü’l-esâmî olan Müslimîn dahi meclis-i mezbûrda fi’l-hakīka mezbûr İbrahim Reis yoldaşları ile ellerinde her birinin toyka ve balta ile sefîne-i mezkûreden fesâd etmek üzere çıkmışlardır deyü ihbâr ve takrîr eylediklerinde mevlânâ-yı mezbûr mahallinde tahrîr ba‘dehû meclis-i şer‘de vukū‘u üzere haber vermeğin mâ-vaka‘a bi’t-taleb ketb olundu. Tahrîren fi’l-yevmi’l-hâdî aşer min-Recebi’l-ferd li-sene isneyn ve sittîn ve elf. Şühûdü’l-hâl: Mustafa Efendi el-İmâm, Mehmed Beşe b. Şaban, İsmail Beşe [b.] Hasan, Musa Halîfe b. Mehmed, Mehmed Beşe b. Abdullah, Süleyman Bey b. Abdülmennan, Mahmud Bey b. Sefer, Abdurrahman Beşe [b.] Said, Şaban Beşe [b.] Yusuf ve gayruhüm.