Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 146 Hüküm no: 160 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Aslan’ın Mehmed Reis b. Süleyman’a olan borcunu taksitler halinde ödeyeceği Mahmiye-i Galata’ya tâbi‘ kasaba-i Tophane mahallâtından Karabaş mahallesi sâkinlerinden Mehmed Reis b. Süleyman nâm kimesne mahfil-i kazâda Agop v. Aslan nâm zimmî muvâcehesinde ikrâr ve takrîr-i kelâm edüp bundan akdem mezbûr Agop zimmetinde buğday bahâsından altı bin akçe hakkım olup taleb eylediğimde meblağ-ı mersûmu def‘aten edâya adem-i kudreti olmağile beher şehr yüzer akçe vermek üzere taksît eyledim vâki‘ hâl kendiden dahi suâl olunsun dedikde gıbbe’s-suâl merkūm Agop fi’l-hakīka müdde‘î-i mezbûr Mehmed Reis’e buğday bahâsından zimmetimde altı bin akçe deynim vardır lâkin def‘aten edâ etmeğe iktidârım olmamağile beher şehr yüzer akçe müdde‘î-i mersûma teslîm etmek üzere taksît eyleyüp ben dahi minvâl-i muharrer üzere taksît-i mezbûru kabûl eylemeğin [47b] işbu hurûf ketb olundu. Tahrîren fi’l-yevmi’s-sâmin aşer min-şehri Recebi’l-ferd li-sene isneyn ve sittîn ve elf. Şühûdü’l-hâl: Fahrü’l-kuzât Mustafa Efendi, Mahmud Beşe b. Mehmed, Yusuf Bey b. Abdülmennan, Mustafa Beşe [b.] Mehmed, Yusuf Beşe b. Mustafa, Mehmed Beşe b. Mustafa, Cafer Beşe b. Mehmed, Ahmed Beşe b. Hızır ve gayruhüm.