Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 150 Hüküm no: 166 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şenlik Dede demekle meşhur Şeyh Hasan Dede b. İshak’ın menzil ve bağ vakfı Şenlik Dede’nin vakfıdır. Kaydı ihrâc şüd Fî 29 Muharrem sene [1]279 [Mühür]: Es-Seyyid Hâfız Mehmed Nuri Elhamdü lillâhi’llezî ce‘ale’l-vakfe sebeben li’l-halâsi mine’n-nîrâni “yevme lâ yenfa‘u mâlün ve lâ benûn” ve hüve yevmü’l-mîzâni’r-rahmân ellezî enzele’l-Kur’ân ve hüve ahkâmü’ş-şerî‘ati ve’l-gufrân bi-ahseni’l-beyân ve’s-salâtü alâ Muhammedini’l-müncî ani’d-dalâleti ve’t-tuğyâne’ş-şefî‘i zünûbi ehli’l-isyân ve alâ âlihi’l-hâdîne’d-dâyn ilâ dâri’l-cinân ve’t-tâbi‘în lehüm bi-ihsân ammâ ba‘d bu vesîka-i sahîha-i şer‘iyyenin tâlibi ve hayrât-ı hasenâtın râgıbı budur ki mahmiye-i Galata’ya tâbi‘ kasaba-i Beşiktaş mahallâtından Maçka nâm mahalde vâki‘ merhûme Vâlide Sultân hazretlerinin binâ eylediği câmi‘-i şerîf kurbünde sâkin eş-Şeyh Hasan Dede b. İshak eş-şehîr bi-Şenlik Dede nâm kimesne vaktâ kim bu dünyâ-yı dûn ve çerh-i bukalemûn kimesneye bâkī değil yakīnini zıll-ı zâil ve mukīmi dayf-ı râhil i‘mârının âharı mâr ve dinarının âkıbeti nâr idiğine vâkıf ve mütenebbih olduysa bu dâr-ı fenâdan menzil-i bekāya ayn-ı ibret ile nâzır ve bu ma‘nânın teemmülünde ve bu ahvâlin tefekküründe sâlik-i râh-ı hidâyet olup tedbîr-i ahvâl ve takdîr-i Rabbi’l-ibâdı iyâd edüp bir semere-i fâide ihdâs etmeğe sıdk-ı niyyet ve hulûs-ı taviyyet ile azîmet eylediği ecilden meclis-i şer‘-i şerîfde hâzır olup vakf-ı âti’l-beyâna li ecli’t-tescîl ve li-emri’t-tetmîm ve’t-tekmîl mütevellî nasb u ta‘yîn eylediği İbrahim Çelebi b. Mehmed nâm kimesne mahzarında bi-tav‘ihî ikrâr-ı sahîh-i şer‘î ve i‘tirâf-ı sarîh-i mer‘î edüp silk-i mülkümde muntazam olup mahalle-i mersûmede vâki‘ bir tarafı Âişe Hatun mülkü ve bir tarafı Ümmühânî Hatun mülkü ve bir tarafı Receb nâm kimesne mülkü ve bir tarafı vâdi ile mahdûd ve mümtâz iki bâb fevkānî odayı ve iki bâb tahtânî odayı ve nîm sofa ve bir bi’r-i mâyı ve kenîfi ve eşcâr-ı müsmire ve gayr-i müsmireyi müştemil mülk menzilimi ve yine karye-i mezbûre bağları kurbünde Mallıayazma demekle ma‘rûf mevzi‘de vâki‘ bir tarafı Papuççu Manol nâm zimmî bağı ve bir tarafı Meyhâneci Petro nâm zimmî bağı ve bir tarafı Bıçakcı Yanaki nâm zimmî bağı ve bir tarafı Ermeni Papa bağı ile mahdûd bir kıt‘a mülk bağımı ve yine karye-i mezbûre bağları kurbünde vâki‘ bir tarafı Ali Efendi tarlası ve bir tarafı Abdülbâkī Çelebi oğlu tarlası ve iki tarafı İbrahim Çelebi tarlaları ile mahdûd bir kıt‘a mülk bağımı dahi safka-i vâhide ile hasbeten lillâhi’l-azîm ve taleben li-merzâti [49b] Rabbihi’l-kerîm vakf ve habs edüp şöyle şart eyledim ki zikr olunan menzil ecr-i misli ile îcâr olunup ücretinden hâsıl olunan meblağ ile sâlifü’z-zikr bağlardan hâsıl olan meyveyi dahi mütevellî-i vakf olan kimesne âhara bey‘ eyleyüp hâsıl olan meblağı dahi izn-i hâkim ile câmi‘-i mezkûr huddâmının vezâyifi ile câmi‘-i mersûmun masârif-i lâzımesine harc u sarf oluna ve ahâlî-i mahalle hasbî nâzır olalar deyü şart ve ta‘yîn edüp zikri mürûr menzil ile sâlifü’z-zikr bağları mütevellî-i merkūm İbrahim Çelebi’ye teslîm eyleyüp ol dahi vakf-ı mezkûr için kabz ve tesellüm <> eyledikden sonra vâkıf-ı mezbûr Hasan Dede mütevellî-i mersûm mahzarında takrîr-i da‘vâ edüp vakf-ı akār İmâm-ı Muhtâr Ebû Hanîfetü’l-Kûfî âmelehu’llâhi bi-lutfihi’l-hafî katında gayr-ı lâzım olup vakf-ı mezkûrdan rücû‘ eyledim mütevellî-i mezbûr kasr-ı yed edüp bana teslîm etmek taleb ederim dedikde mütevellî-i merkūm dahi bi’l-mukābele cevâb verip vakf-ı merkūm İmâmeyn-i Hümâmeyn katlarında vakf lâzım kabîlindendir zîrâ sıhhat ve lüzûmu re’y-i İmâmeyn-i Hümâmeyn meşrû‘dur deyüp hâkim-i muvakki‘ü’l-kitâb tûbâ-lehû ve hüsnü-meâb huzûrunda mürâfa‘a olup re’y-i İmâmeyn üzere sıhhat ve lüzûmuna hükm-i şer‘î ve kazâ-i mer‘î edüp vakf-ı mersûm vakf-ı sahîh ve lâzım olup min-ba‘d nakz ve nakīzına mecâl muhâl ve tağyîr ve tebdîlden mümteni‘ü’l-ihtimâl oldu. “Femen beddelehû ba‘de mâ-semi‘ahû fe-innemâ ismühû ale’llezîne yübeddilûnehû innallâhe semî‘un alîm” ve ecrü’l-vâkıfı ale’l-hayyi’l-cevâdi’l-kerîm cerâ zâlik. Ve hurrire fi’l-yevmi’l-hâmis aşer min-şehri Recebi’l-mürecceb li-sene isneyn ve sittîn ve elf. Şühûdü’l-hâl: Es-Seyyid Mustafa Çelebi b. Mahmud, el-Hâc Mustafa b. Yakub, es-Seyyid Mustafa Çelebi b. Ahmed, Mustafa Halîfe Müezzin, Mahmud Çelebi [b.] İbrahim, Ali Bey b. Mustafa, Ahmed Çelebi b. Mehmed, Ömer Çelebi b. Süleyman, Receb Beşe b. Mehmed, İbrahim Beşe [b.] Ahmed, Usta Süleyman Hayyât, Ali Bey b. Haşim, Yusuf Bey b. Abdullah, Mahmud Çelebi b. Mehmed, Mustafa Beşe [b.] Mehmed, Cafer Beşe b. el-mezbûr, Mehmed Muhzır.