Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 149 Hüküm no: 165 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Şaban’ın, bir fırını ile iki dükkanını istiğlal yolu ile Ahmed Ağa b. Abdurrahman’a sattığı Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinlerinden fahrü’l-akrân Mustafa Bey b. Şaban nâm kimesne mahfil-i kazâda mahmiye-i mezbûre hâricinde vâki‘ Müeyyedzâde mahallesi sükkânından hâmil-i hâze’l-kitâb aynü’l-a‘yân Ahmed Ağa b. Abdurrahman nâm kimesne mahzarında bi-tav‘ihî ikrâr ve takrîr-i kelâm edüp silk-i mülkümde münselik olup mahalle-i merkūmede vâki‘ bir tarafı İsmail Ağa odaları ve bir tarafı yine kendi bahçeme ve bir tarafı yine menzilim kapısına ve bir tarafı tarîk-i âm ile mahdûd bir değirmenli ekmekçi fırını ve iki bâb dükkânlarımı ba‘de’t-tahliyeti’ş-şer‘iyye müşârun ileyh Ahmed Ağa’ya kendi mâlı ile bi-tarîki’l-istiğlâl bin kıt‘a nakd ve çuka bahâsından dahi yüz kıt‘a cem‘an bin yüz kıt‘a riyâlî guruş-ı kebîre tarafeynden îcâb ve kabûlü hâvî bey‘ ve teslîm eyleyüp ol dahi vech-i meşrûh üzere alâ-tarîki’l-istiğlâl iştirâ ve tesellüm eyleyüp semeni olan meblağ-ı mezkûru müşârun ileyh Ahmed Ağa yedinden bi’t-tamâm ve’l-kemâl ahz u kabz eyledikden sonra yine sâlifü’z-zikr fırın ile dükkânları târih-i kitâbdan üç yüz altmış gün tamâmına değin yüz elli kıt‘a riyâlî guruş-ı kebîre müşârun ileyh Ahmed Ağa’dan istîcâr ve kabz ve tesellüm edüp ol dahi vech-i muharrer üzere meblağ-ı merkūm yüz elli kıt‘a riyâlî guruş-ı kebîre bana îcâr ve def‘ ve teslîm eyledi [49a] dedikde gıbbe’t-tasdîki’ş-şer‘î hudûd-ı mezkûr ile mahdûd olan fırın ile dükkânların derkine ve ücret-i lâzımesine fahrü’l-eşbâh Ebûbekir Bey b. el-merhûm Murad Paşa emr ve kabûlü hâviye kefâlet-i sahîha-i şer‘iyye ile kefîlim dedikde mâ-vaka‘a bi’t-taleb ketb olundu. Tahrîren fi’l-yevmi’l ışrîn min-şehri Recebi’l-ferd li-sene isneyn ve sittîn ve elf. Şühûdü’l-hâl: Yahya Ağa b. Abdülmennan, Abdülhay Çelebi b. Mustafa, Hasan Efendi b. Mehmed, Mehmed Kapudan b. Bayram, Hüseyin Efendi b. Ali, Mehmed Bey b. Ebûbekir Bey, Mahmud Çelebi b. Mehmed, İbrahim Çelebi b. Mustafa, İlyas Dede b. Mehmed, Cafer Beşe b. Mehmed ve gayruhüm.