Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 152 Hüküm no: 168 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe’nin babası Veli Beşe’den intikal eden veraset hissesini annesi Saliha Hatun bt. Mustafa’dan teslim aldığı Mahmiye-i Galata’ya tâbi‘ kasaba-i Beşiktaş’da Sultân Süleyman Hân mahallesinde sâkin iken bundan akdem müteveffâ olan Veli Beşe b. ( ) nâm kimesnenin verâseti zevce-i metrûkesi Saliha Hatun bt. Mustafa’ya ve sulbiye kebîre kızı Âişe nâm hatuna münhasıra olmağile muhallefâtının sekiz sehimden bir sehmi mezbûre Saliha’ya ve yedi sehmi merkūme Âişe’ye isâbet eylediği şer‘an zâhir ve mütehakkık oldukdan sonra mezbûre Âişe mahfil-i kazâda müteveffâ-yı mersûmun muhallefâtına vâzı‘atü’l-yed olan işbu bâ‘isetü’l-kitâb merkūme Saliha’nın zevci ve tarafından tasdîka vekîl olup bimâ hüve tarîki’s-sübût şer‘an vekâleti sâbite olan Ahmed Ağa b. Mustafa mahzarında ikrâr-ı tâm ve ta‘bîr ani’l-merâm edüp babam müteveffâ-yı merkūmun akār-ı menkūl ve esâs-ı beyt ve evânî-i nühâsiye ve gayr-ı nühâsiyye ve bi’l-cümle ism-i mâl ıtlâk olunan cemî‘ metrûkâtından bi-hasebi’l-irsi’ş-şer‘î bana intikāl eden hisse-i mezkûrem mukābelesinde mezbûre Saliha Hatun yedinden dört bin sekiz yüz akçe hakkımı alıp kabz muhallefât-ı müteveffâ-yı merkūma müte‘allik cemî‘ de‘âvî ve mutâlebâtdan merkūme Saliha Hatun’un zimmetini ibrâ ve ıskāt eyledim ba‘de’l-yevm muhallefât-ı mezkûreden hisse-i mezkûreye müte‘allik mersûme Saliha Hatun ile vechen mine’l-vücûh da‘vâ ve nizâ‘ım kalmadı dedikde mukırre-i merkūmenin vech-i muharrer üzere cârî ve sâdır olan kelâmını merkūm Ahmed Ağa bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fî-gurreti Şa‘bâni’l-mu‘azzam li-sene isneyn ve sittîn ve elf. Şühûdü’l-hâl: Abdülkerim Efendi el-İmâm, Yusuf Efendi Müezzin, Mehmed Çavuş b. Tulû‘î, Bâkī Çelebi el-Mübâşir, Mehmed Beşe [b.] Ramazan.