Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 158 Hüküm no: 179 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arslan v. Manol’ün Arnavutköyü’ndeki menzilini Kostantin v. Tonoz’a sattığı Mahmiye-i Galata muzâfâtından kasaba-i Beşiktaş’a tâbi‘ Arnavud nâm karye sâkinlerinden iken bundan akdem hâlik olan Manol v. Nikola’nın verâseti sulbî kebîr oğlu Arslan ile sulbiye kebîre kızı Naranciye nâm Nasrâniyeye münhasıra idüği şer‘an zâhir ve müte‘ayyin oldukdan sonra mezbûr Arslan mahfil-i kazâda işbu râfi‘ü’s-sifr Kostantin v. Tonoz nâm zimmî muvâcehesinde bi-tav‘ihî ikrâr ve takrîr-i kelâm edüp babam hâlik-i merkūm Manol’un metrûkâtından bi-hasebi’l-irsi’ş-şer‘î bana âid olan hisse-i şer‘iyyem mukābelesinde ta‘yîn ve tahsîs olup karye-i mezbûrede vâki‘ bir tarafı Yorgi nâm zimmî mülkü ve bir tarafı Karanfil v. Yorgi nâm zimmî mülkü ve iki tarafı tarîk-i âm ile mahdûd fevkānî ve tahtânî bir bâb odayı ve bir mahzeni ve kenîfi müştemil mülk-i mevrûs menzilimi bi-cümleti’t-tevâbi‘ ve’l-levâhık mezbûr Kostantin’e on bir bin iki yüz elli nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı mârrü’z-zikr on bir bin iki yüz elli akçeyi merkūm Kostantin yedinden bi’t-tamâm ve’l-kemâl ahz u kabz eyledim ba‘de’l-yevm sâlifü’z-zikr menzil-i mersûm Kostantin’in mülk-i müşterâsıdır keyfe mâ yeşâ ve yehtâr mutasarrıf olsun dedikde mukırr-ı mezbûr Arslan’ın vech-i muharrer üzere cârî ve sâdır olan ikrârını el-mukarru lehü’l-merkūm Kostantin bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mahmud Çelebi b. Mehmed, Bâki Çelebi b. Derviş, Mehmed Beşe b. Abdullah, İlyas Beşe [b.] İbrahim, Mehmed Beşe b. Abdullah, Yusuf Beşe b. Abdullah, Mustafa Beşe [b.] Mehmed, Yamandi v. Hristodori, Kostantin v. Refayil, İstirati v. Andreya, Lenberyo v. Andreya, Nikola v. Kiryako, Ademi v. İksenita, Yanaki v. Moskov, Arslan v. Rizo, Yorgo v. Dimitri, Pandazi v. Dimitri, Apostol v. Mano, Yani v. Yorgo ve Lisari v. Kostantin ve gayruhüm.