Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 158 Hüküm no: 178 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Diyani’nin Arnavutköyü’ndeki arsasını Kostantin v. Tonoz’a sattığı Mahmiye-i Galata muzâfâtından kasaba-i Beşiktaş’a tâbi‘ Arnavud nâm karye sâkinlerinden Yorgi v. Diyani nâm zimmî mahfil-i kazâda işbu râfi‘ü’s-sifr Kostantin v. Tonoz nâm zimmî muvâcehesinde ikrâr ve takrîr-i kelâm edüp karye-i mezbûrede vâki‘ bir tarafı kendi mülküm ve üç tarafı merkūm Kostantin mülkü ile mahdûd tûlen üç zirâ‘ ve arzen on sekiz parmak Mozava ta‘bîr olunur mülk arsa-i hâliyemi merkūm Kostantin’e dört kıt‘a riyâlî guruşa tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı mârrü’z-zikr dört guruşu merkūm Kostantin yedinden tamâmen alıp kabz eyledim ba‘de’l-yevm arsa-i mezkûre mersûm Kostantin’in mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mahmud Çelebi b. Mehmed, Bâki Çelebi b. Derviş, Mehmed Beşe b. Abdullah, İlyas Beşe [b.] İbrahim, Mehmed Beşe b. Abdullah, Yamandi v. Hıristo, Yanoç v. Yani, Anastaş v. Anton, Hıristosko v. Yamandi, İstirati v. Andreya, Lenberyo v. Andreya, Androni v. Yani, Nikola v. Kiryako, Ademi Reîs v. İksenita, Yanaki v. Moskov, Yorgi v. Dimo, Pandazi v. Tarandafile ve gayruhüm.