Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 159 Hüküm no: 181 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Osman’ın ortakları Hacı Süleyman b. Mustafa ve Hacı Ahmed b. Said ile sulh olduğu Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden fahrü’l-a‘yân Mehmed Efendi b. Osman nâm kimesne meclis-i şer‘-i hatîr-i lâzımü’t-ta‘zîmde şerîki olup hurdacı tâifesinden Hacı Süleyman b. Mustafa ve Hacı Ahmed b. Saîd nâm kimesneler taraflarından sulh-ı âti’l-beyânı tasdîka vekîl olup mahzar-ı hasm-ı câhidde el-Hâc Ali b. Merzuk ve Hacı Yahya b. Merzuk nâm kimesneler şehâdetleri ile şer‘an vekâleti sâbite olan el-Hâc Ali Kapudan b. Abdurrahman nâm kimesne mahzarında ikrâr ve takrîr-i kelâm edüp târih-i kitâbdan on beş gün mukaddem müvekkil-i merkūm Hacı Süleyman şerîki mersûm Hacı Ahmed’in ma‘rifetiyle karye-i mezbûrede vâki‘ menzilime gelip işbu hâzırân bi’l-meclis Maksud ve Muzaffer dahi müvekkil-i merkūm Süleyman’ın iğvâsıyla menzil-i mezkûrda vâki‘ hamamın üzerinde kâin kurşundan beher tahtası on altışar vakiyye gelir tahmînen elli dört tahta kurşunu hafiyyeten alıp mezbûr Süleyman’a teslîm etmekle ben dahi zikr olunan kurşunu merkūm Süleyman’dan da‘vâ ve taleb eylediğimde müvekkil-i merkūm Süleyman mezbûrân Maksud ve Muzaffer’i idlâl ve yedlerinden ancak elli vakiyye kurşun aldım deyü ikrâr mâ‘adâyı inkâr etmeğin ben dahi ziyâdeyi isbât sadedinde iken beynimize muslihûn tavassut edüp da‘vâ-yı mezkûrumdan beni dört yüz akçe ile üç yüz yetmiş vakiyye kurşun üzerine inşâ-yı akd-i sulh eylediklerinde ben dahi sulh-ı merkūmu kabûl ve bedel-i sulh olan meblağ-ı mezkûr ile üç yüz yetmiş vakiyye kurşunu vekîl-i mezbûr el-Hâc Ali Kapudan’dan tamâmen alıp kabz edüp de‘avâdan müvekkilân-ı mezbûrân Hacı Süleyman ve Hacı Ahmed’in zimmetlerini ibrâ ve ıskāt eyledim ba‘de’l-yevm husûs-ı merkūma müte‘allik müvekkilân-ı mezbûrân ile da‘vâ ve nizâ‘ım kalmadı sudûr dahi ederse lede’l-hükkâmi’l-kirâm mesmû‘a ve makbûle olmasın dedikde mukırr-ı müşârun ileyhin vech-i meşrûh üzere cârî ve sâdır olan ikrârını vekîl-i merkūm el-Hâc Ali Kapudan bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-hâmis min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Ahmed Çelebi b. Abdülkerîm, Ali Bey b. Mustafa, Hasan Beşe b. Abdullah, Ahmed Beşe b. Receb, Mustafa Beşe b. Mehmed, Cafer Beşe b. Mehmed, Mehmed Beşe b. Ramazan ve gayruhüm.