Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 160 Hüküm no: 182 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Beşe ve Osman Usta’nın Rus asıllı cariyeleri Badıreftar’ı azad ettikleri Mahmiye-i Galata’ya tâbi‘ kasaba-i Beşiktaş mahallâtından merhûme Hanım Hatun mahallesi sâkinelerinden iken bundan akdem müteveffât olan Üftâde bt. Abdullah nâm hatunun verâseti zevc-i metrûkü Yusuf Beşe b. Mehmed nâm kimesne ile mevlâsı fahrü’l-akrân Osman Usta b. Hüseyin’e münhasıra oldukdan sonra mezbûrân Yusuf Beşe ve Osman Usta taraflarından ıtk-ı âti’l-beyânı ikrâra vekîl olup mahzar-ı hasm-ı câhidde Enver Efendi b. İslam ve Hasan Çelebi b. Muharrem nâm kimesneler şehâdetleri ile şer‘an vekâleti sâbite olan Mehmed Efendi b. Zülfikâr nâm kimesne mahfil-i kazâda işbu bâ‘isetü’l-kitâb orta boylu açık kaşlı koyun elâ gözlü Rusiyyetü’l-asl olup rıkkiyyetine mu‘terife olan Bâdreftâr bt. Abdullah nâm câriye muvâcehesinde bi’l-vekâle ikrâr ve takrîr-i kelâm edüp evsâf-ı mezkûre ile mevsûfe olan merkūme Bâdreftâr müteveffât-ı mezbûrenin hâl-i sıhhatinde câriye-i memlûkesi olup ba‘de vefâtihî bi-hasebi’l-irsi’ş-şer‘î müvekkilân-ı mezbûrâna intikāl etmekle müvekkilân-ı mersûmân dahi merkūme Bâdıreftâr’a hasbeten lillâhi te‘âlâ ve taleben li-merzâtihî mâllarından ihrâc [ve] i‘tâk ve tahrîr eylediler ba‘de’l-yevm mezbûre Bâdreftâr sâir harâir-i asliyyât gibi hürre olup uhdesinde mevâlî için utekā üzerine sâbit olan hakk-ı velâdan gayrı alâkaları kalmadı dedikde vekîl-i mezbûrun vech-i meşrûh üzere cârî ve sâdır olan ikrârını merkūme Bâdreftâr talebiyle ketb ve terkīm olundu. Tahrîren fi’l-yevmi’s-sânî aşer min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Halil Efendi el-kādı, Muharrem Bey b. Abdülmennan, İsmail Bey bevvâb-ı sultânî, Veli Beşe b. Abdullah, Hüseyin Çelebi b. Muharrem, İbrahim Efendi el-müderris, Lütfi Çelebi b. Mustafa, Esad Çelebi b. Mustafa, Mehmed Çelebi b. Veli, Derviş Mehmed mevlevî, Cafer muhzır.