Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 161 Hüküm no: 183 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Osman’ın Ortaköy’deki bağını yolu ile birlikte Ahmed Efendi b. Mehmed’e sattığı Mahrûse-i İstanbul’da Âşık Paşa mahallesi sâkinlerinden Ahmed Bey b. Osman nâm yesârî meclis-i şer‘-i hatîr-i lâzımü’t-tevkīrde işbu sâhibü’l-kitâb fahrü’l-eimme Ahmed Efendi b. Mehmed nâm kimesne mahzarında ikrâr ve takrîr-i kelâm edüp mahmiye-i Galata muzâfâtından kasaba-i Beşiktaş’a tâbi‘ Orta nâm karye bağları sınırı dâhilinde vâki‘ merhûm Sultân Bayezid Hân Vakfı’na senede yirmi iki akçe mukāta‘a zemîni olup bir tarafı Hasan Çelebi bağı ve bir tarafı Mehmed Efendi bağı ve bir tarafı ismi nâ-ma‘lûm Ermeni bağı ve bir tarafı İlya nâm Yahudi bağı ile mahdûd olan bir kıt‘a mülk [55a] bağımı ve tûlen elli zirâ‘ ve arzen iki zirâ‘ tarîk-i hâs ile mezbûr Ahmed Efendi’ye seksen kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı mârrü’z-zikr seksen kıt‘a riyâlî guruşa mezbûr Ahmed Efendi yedinden bi’t-tamâm ve’l-kemâl ahz u kabz eyledim ba‘de’l-yevm sâlifü’z-zikr bağ-ı merkūm Ahmed Efendi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde mukırr-ı mezbûr Ahmed Bey’in vech-i muharrer üzere cârî ve sâdır olan ikrârını el-mukarru lehü’l-merkūm Ahmed Efendi bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mustafa Efendi b. Mehmed, Mustafa Halîfe el-müezzin, Arslan Beşe b. Hasan, Ömer Çelebi b. Cuma, Mahmud Beşe b. Abdullah, Mustafa b. Ahmed, Mustafa b. Mehmed, Mustafa b. Mehmed, Mehmed Beşe b. Ramazan, Mehmed Çelebi b. Mahmud ve gayruhüm.