Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 162 Hüküm no: 185 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maçka köyünden Mehmed b. Şemsi’nin karısı Ayşe bt. Mustafa’yı dövdüğü Mahmiye-i Galata muzâfâtından kasaba-i Beşiktaş’a tâbi‘ Maçuka nâm karye sâkinelerinden Âişe bt. Mustafa nâm hatun mahfil-i kazâda zevci Mehmed b. Şemsi nâm kimesne mahzarında üzerine da‘vâ ve takrîr-i kelâm edüp târih-i kitâb gecesi mezbûr Mehmed bi-gayrı vechin yumruğu ile başıma ve yüzüme darb-ı şedîd ile darb etmeğin suâl olunup mûcib-i şer‘îsi icrâ olunmak matlûbumdur dedikde gıbbe’s-suâl merkūm Mehmed cevâbında zevcem mezbûre Âişe bana asılacak deyü şetm edüp ben dahi mezbûreyi yumruğum ile başına ve yüzüne darb eyledim deyicek gıbbe’l-istintâk mezbûre Âişe zevci merkūm Mehmed’e asılacak deyü şetm eylediğini inkâr eylemeğin mezbûr Mehmed’den takrîrine mutâbık beyyine taleb olundukda ityân-ı beyyineden izhâr-ı acz edüp tahlîf dahi taleb etmediğinden karye-i mezbûre ahâlîsinden olup zeyl-i kitâbda mastûru’l-esâmî cemâ‘at-i Müslimîn dahi li-ecli’l-ihbâr meclis-i şer‘a hâzırûn olup merkūm Mehmed aslâ cemâ‘ati ile salâta hâzır olmayıp ekser evkātda sekrânen fesâddan hâlî olmadığı ecilden her birimiz sû’-i hâlinden müte’ezzîleriz deyü ihbâr eylediklerinde mûcibiyle mâ-vaka‘a bi’t-taleb ketb olundu. Tahrîren fi’l-yevmi’l-ışrîn min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Ali Bey b. Hâşimî, İbrahim Çelebi b. Mehmed, Ömer Çelebi b. Süleyman, Ahmed Beşe b. Mehmed, Usta Süleyman terzi, Şaban Beşe b. Mahmud, Mustafa Beşe b. Abdi, Mustafa Çelebi b. Mehmed, Mehmed b. Receb, Hasan b. Mustafa, Receb b. Mustafa, Mehmed b. Mustafa.