Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 165 Hüküm no: 188 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Cafer Paşa’nın yarım menzil hissesini oğlu Cafer Kapudan b. Şaban Ağa’ya hibe ettiği Mahmiye-i Galata’ya tâbi‘ kasaba-i Beşiktaş’da Sinanpaşa mahallesi sâkinelerinden fahrü’l-muhadderât tâcü’l-mestûrât Âişe Hanım bt. el-merhûm Cafer Paşa kıbelinden vech-i âtî üzere ikrâra vekîl olup hasm-ı şer‘î-i câhid mahzarında müşârun ileyhâyı ma‘rifet-i şer‘iyye ile ârifân olan İbrahim Bey b. Ahmed Ağa ve İshak Çelebi b. Nurullah nâm kimesneler şehâdetleri ile şer‘an vekâleti sâbite olan umdetü’l-a‘yân Mehmed Bey b. el-merhûm Ahmed Ağa meclis-i şer‘-i şerîf-i lâzımü’t-tekrîmde müvekkile-i müşârun-ileyhânın sadrî kebîr oğlu zahrü’l-akrân Cafer Kapudan b. Şaban Ağa mahzarında bi’l-vekâle ikrâr ve takrîr-i kelâm edüp müvekkile-i müşârun ileyhânın babası olup mukaddemâ müteveffâ olan merhûm-ı mezbûr Cafer Paşa’nın mahalle-i mezbûrede vâki‘ bir tarafı Mehmed Ağa b. el-merhûm Sinan Çavuş ve bir tarafı sâhil-i bahr ve iki tarafı tarîk-i âm ile mahdûd saray ta‘bîr olunur mülk menzilin nısf-ı şâyi‘i ba‘de vefâtihî müvekkile-i müşârun-ileyhâya ve nısf-ı âharı diğer sadriye kebîre kızı Belkıs Hânım’a intikāl eylediği ve beynlerinde bi’t-terâzî taksîm ve ifrâz olunduğu şer‘an sâbit ve mütehakkık oldukdan sonra müvekkile-i müşârun ileyhâ Âişe Hanım kendi hissesine ta‘yîn ve tahsîs olunup menzil-i mezkûrun müştemilâtından olan sarı kapı kurbünde yalıya varınca üç bâb fevkānî odaları ve bir kileri ve sundurmayı ve altında iki mahzeni ve bi’r-i mâ’î ve bahçeyi [57b] ve dîvânhâne ardında olan arz-ı hâliyeyi ve sarı kapıdan yalı köşesine varınca kırk iki buçuk zirâ‘ arsayı ve yalı köşesinden şehnişînli odaya varınca otuz sekiz zirâ‘ yere gelince arsayı ve dîvânhâneden ikinci direk beyninde tûlen on bir zirâ‘ yere varınca başdan dört zirâ‘ lamba ile deryâ yüzünde iki odayı ve ona muttasıl dîvânhânenin sadrı tarafında olan büyük sofayı ve orta kapı yanında nerdübâna muttasıl ocaklı bir odayı ve kurbünde ocaksız bir odayı ve matbahı ve hamamı ve kenîfi ve taş nerdübânı ve altlarında olan mahzenleri ve bi’r-i mâ’î ve orta bahçeden pınar tarafında zindân cânibinde arzen üç zirâ‘ ve iç evler tarafında dahi üç zirâ‘ ve tûlen otuz bir zirâ‘ yeri ve tahtânî matbahı ve üstünde üç odaları ve zindân kapısı üstünde mükemmel bir odayı ve dehlîzi ve matbah kapısı önünde çıkan nerdübânı ve musluk kurbünde tûlen yirmi bir buçuk zirâ‘ ve arzen iki buçuk zirâ‘ yolu ve nısf zindân ve üstünde olan mikdârı odaları ve bir köhne matbahı ve altında bir odayı ve önünde havluyu ve zindâna muttasıl olan fırını ve içinde olan anbarı ve fırın yanında mezbûr Sinan Çavuş mülküne muttasıl sekiz fevkānî odaları ve altında mahzenleri ve bi’r-i mâ’î ve yine kurbünde üç bâb odaları ve altında mahzeni ve yalıya varınca tûlen otuz dokuz zirâ‘ ve arzen on dört zirâ‘ arz-ı hâliyeyi müştemil mülk-i mevrûs nısf-ı şâyi‘-i merkūm menzilini bi-cümleti’t-tevâbi‘ ve’l-levâhık târih-i kitâbdan dört sene mukaddem ba‘de’t-tahliyeti’ş-şer‘iyye oğlu mûmâ-ileyh Cafer Kapudan’a hibe-i sahîha-i şer‘iyye ile hibe ve temlîk ve teslîm edüp ol dahi meclis-i hibede ittihâb ve kabz ve temellük ve tesellüm eylemiş idi târih-i mezkûr gününden beri zikr olunan sarayın nısf-ı şâyi‘-i mersûmu mûmâ-ileyh Cafer Kapudan’ın mülk-i mevhûbu [58a] olup müvekkile-i müşârun ileyhânın kat‘â alâka ve medhali kalmamışdır keyfe mâ yeşâ ve yehtâr sâir emlâkı gibi mutasarrıf olsun dedikde vekîl-i mezbûr Mehmed Bey’in vech-i meşrûh üzere cârî ve sâdır olan ikrârını mûmâ-ileyh Cafer Kapudan bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-ışrîn min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Ebûbekir b. Murad Paşa, Ahmed Efendi b. ( ), Ömer Ağa b. Abdullah, Mehmed Ağa b. Şaban, Seyyid Hacı Ahmed b. Seyyid Mehmed, Mehmed Çelebi b. Bayram Ağa, Mustafa Bey b. Şaban, Mustafa Kapudan b. Receb Kethüdâ, Abdüsselâm Çelebi b. el-mezbûr, Musa Bey b. Cafer Bey, Mehmed Çelebi b. Ramazan, Mustafa Çelebi b. Keyvan yesârî, Ahmed Reis b. Mehmed, Mustafa Halîfe b. Yakub, Cafer Efendi b. Şükrüllah, Mehmed Reis b. ( ), Mehmed Çelebi b. Ahmed, Mahmud Çelebi b. Mehmed, Mehmed Ağa b. Mehmed ve gayruhüm.