Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 166 Hüküm no: 189 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Cafer Paşa’nın bazı emlakini oğlu Cafer Kapudan b. Şaban Ağa’ya hibe ettiği Mahmiye-i Galata’ya tâbi‘ kasaba-i Beşiktaş’da Sinanpaşa mahallesi sâkinelerinden fahrü’l-muhadderât Âişe Hânım bt. el-merhûm Cafer Paşa tarafından vech-i âtî üzere ikrâra vekîl olup hasm-ı şer‘î-i câhid mahzarında müşârun ileyhâyı ma‘rifet-i şer‘iyye ile ârifân olan İbrahim b. Ahmed Ağa ve İshak Çelebi b. Nurullah nâm kimesneler şehâdetleri ile şer‘an vekâleti sâbite olan umdetü’l-a‘yân Mehmed Bey b. el-merhûm Ahmed Ağa meclis-i şer‘-i hatîr-i lâzımü’t-tevkīrde müvekkile-i müşârun-ileyhânın sadrî kebîr oğlu işbu sâhibü’l-kitâb zahrü’l-akrân Cafer Kapudan b. Şaban Ağa mahzarında bi’l-vekâle ikrâr ve takrîr-i kelâm edüp müvekkile-i müşârun-ileyhânın silk-i mülkünde münselik olup kasaba-i mezbûre bağları sınırı dâhilinde vâki‘ bir tarafı bazen Küçük Çavuş bağı ve bazen Beylik bağı ve iki tarafı Hürmüz nâm zimmî bağı ve bir tarafı tarîk-i âm ile mahdûd iki kıt‘a mülk bağını ve yine zikri mürûr eden bağlar kurbünde vâki‘ lede’l-ahâlî ve’l-cîrân ma‘lûmü’l-hudûd ve’z-zirâ‘ mülk arsa-i hâliyesini bi-cümleti’t-tevâbi‘ ve’l-levâhık târih-i kitâbdan dört sene mukaddem oğlu mûmâ-ileyh Cafer Kapudân’a safka-i vâhide ile hibe-i sahîha-i şer‘iyye ile hibe [58b] ve temlîk ve teslîm edüp ol dahi meclis-i hibede ittihâb ve temellük ve tesellüm eylemiş idi târih-i kitâb-ı mezkûr gününden beri sâlifü’z-zikr bağlar ile arsa-i mezkûre mûmâ-ileyh Cafer Kapudan’ın mülk-i mevhûbu olup müvekkile-i müşârun-ileyhânın kat‘â alâka ve medhali yokdur dedikde vekîl-i mezbûrun vech-i muharrer üzere cârî ve sâdır olan ikrârını mûmâ-ileyh Cafer Kapudan bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-ışrîn min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: es-Sâbikūn.