Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 169 Hüküm no: 194 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Osman’ın Beşiktaş’taki menzil ve arsasını Mehmed Çavuş b. Veli’ye sattığı Mahmiye-i Galata’ya tâbi‘ kasaba-i Beşiktaş’da Sinanpaşa mahallesi sâkinelerinden Âişe bt. Osman nâm hatun mahfil-i kazâda işbu sâhibü’l-kitâb Mehmed Çavuş b. Veli mahzarında ikrâr ve takrîr-i kelâm edüp mahalle-i mezbûrede vâki‘ bir tarafı merhûm Küçük Çavuş vereseleri mülkü ve bir tarafı Mehmed Çelebi b. Mahmud mülkü ve bir tarafı tarîk-i âm ve bir tarafı tarîk-i hâs ile mahdûd üç bâb fevkānî beyti ve bir sofayı ve bir bâb tahtânî odayı ve iki ahırı ve kenîfi ve eşcâr-ı müsmire ve gayr-ı müsmireyi müştemil mülk menzilimi cümle tevâbi‘ ve levâhıkı ile ve menzil-i mezkûrun kurbünde cebele muttasıl olup bir tarafı Hürmüz nâm zimmî tarlası ve iki tarafı tarîk-i âm ve bir tarafı mekābir-i Müslimîn ile mahdûd bennâ zirâ‘ıyla tûlen yirmi yedi zirâ‘ ve arzen yedi zirâ‘ arsa-i hâliyemi dahi safka-i vâhide ile mezbûr Mehmed Çavuş’a on iki bin yüz nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı mârrü’z-zikr on iki bin yüz akçeyi merkūm Mehmed Çavuş yedinden tamâmen alıp kabz eyledim ba‘de’l-yevm sâlifü’z-zikr menzil ile arsa-i mezkûre mersûm Mehmed Çavuş’un mülk-i müşterâsıdır keyfe mâ yeşâ ve yehtâr mutasarrıf olsun dedikde mukırre-i mezbûre Âişe’nin vech-i meşrûh üzere cârî ve sâdır olan ikrârını el-mukarru lehü’l-merkūm Mehmed Çavuş bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fî-selhi Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Hasan b. Hüseyin, Mustafa b. Abdullah, Yusuf Bey muhtesib, Mustafa Beşe b. Mehmed, Mehmed Çelebi b. Ramazan, Cafer Beşe b. Mehmed, Mehmed Çelebi b. el-Hâc Mahmud, Halil Beşe b. Hüseyin, Mustafa b. Mehmed, Murad b. Mehmed, Ahmed Çelebi ma‘kūlca, Yusuf Bey el-cündi, Osman Efendi b. ( ), Ahmed Çelebi b. Mehmed, Ali b. Nasûh, Çorlu Mehmed Beşe, Usta Mehmed testereci, Halil Çelebi [b.] Ramazan, Derviş Bey, Ali Efendi el-imâm, Yusuf Efendi el-müezzin.