Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 170 Hüküm no: 196 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiro v. Kulu’nun bıçakla Köni v. Petko’yu sol dizinden yaraladığı Mahmiye-i Galata’da Arab Çarşısı kurbünde sâkin işbu râfi‘ü’s-sifr Köni v. Petko nâm zimmî mahfil-i kazâda Kiro v. Kulu nâm zimmîyi ihzâr ve muvâcehesinde üzerine da‘vâ ve takrîr-i kelâm edüp merkūm Kiro târih-i kitâb günü ba‘de’z-zuhr mahmiye-i mezbûreye tâbi‘ kasaba-i Beşiktaş’da vâki‘ Ayazma nâm mevzi‘de sekrânen elinde siyâh saplı bıçak ile amden sol dizime bir perde urup mecrûh eyledi suâl olunup mûcib-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan da‘vâsına mutâbık beyyine taleb olundukda udûl-i ricâlden olup mahmiye-i merkūmeye tâbi‘ kasaba-i Tophane mahallâtından el-Hâc Ali mahallesi sâkinlerinden Mustafa Beşe b. Mehmed ve Abdulbâki b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka merkūm Kiro târih-i kitâb günü ba‘de’z-zuhr mevzi‘-i mezkûrda bizim huzûrumuzda sekrânen elinde bu siyâh saplı bıçak ile müdde‘î-i mezbûr Köni’yi sol dizine [61a] bir perde amden urup mecrûh eyledi biz bu husûsa bu minvâl üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mâ-vaka‘a bi’t-taleb ketb olundu. Tahrîren fî-gurreti Ramazâni’l-mübârek li-sene isneteyn ve sittîn ve elf. Şühûdü’l-hâl: Abdi Beşe b. Ali, Mehmed Çelebi b. Hüsam, Ahmed Çelebi b. Mehmed, Mehmed Çelebi b. Bâki, Murad Çelebi b. Mehmed, Cafer Efendi b. Şükrüllah, Yusuf Bey muhtesib, Mustafa Beşe b. Mehmed, Mehmed b. Ramazan muhzır ve gayruhüm.