Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 171 Hüküm no: 197 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdullah’ın arsasını Ali Çelebi b. Mehmed’e yedi yüz elli akçeye sattığı Mahmiye-i Galata’ya tâbi‘ kasaba-i Beşiktaş mahallâtından Arab İskele mahallesinde sâkin iken bundan akdem müteveffâ olan Ahmed b. Abdullah nâm kimesnenin verâseti sulbî kebîr oğlu Ali nâm kimesne ile sulbiye kebîre kızı Hadice nâm hatuna münhasıra olduğu şer‘an mütebeyyin oldukdan sonda mezbûr Ali mahfil-i kazâda işbu sâhibü’l-kitâb diğer Ali Çelebi b. Mehmed nâm kimesne mahzarında ikrâr ve takrîr-i kelâm edüp muhallefât-ı müteveffâ-yı mezkûreden olup mahalle-i mezbûrede vâki‘ iki tarafı kendi mülküm ve bir tarafı merkūm Ali Çelebi mülkü ve bir tarafı tarîk-i âm ile mahdûd bennâ zirâ‘ıyla tûlen on üç zirâ‘ ve arzen dört zirâ‘ arsa-i hâliye hisse-i şer‘iyyem mukābelesinde bana ta‘yîn olunan arsadan olmağla hâlâ arsa-i mezkûreyi mersûm Ali Çelebi’ye yedi yüz elli nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi ber-vech-i muharrer iştirâ ve tesellüm ve kabz eyledikden sonra semeni olan meblağ-ı mezkûr yedi yüz elli akçeyi merkūm Ali Çelebi yedinden tamâmen alıp kabz eyledim ba‘de’l-yevm arsa-i mezkûre merkūm Ali Çelebi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î [61b] mâ-vaka‘a bi’t-taleb ketb olundu. Tahrîren fî-selh min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: İbrahim Çelebi b. Hacı Mahmud, Mustafa Çelebi el-imâm, Yusuf Efendi müezzin, Kurd Çelebi müezzin, Kadri Çelebi b. Mehmed, Mahmud b. Ahmed, Mehmed Çelebi b. Ali, Ahmed Çelebi b. Esad, Yusuf Bey b. Abdullah, Mehmed Beşe b. Receb ve gayruhüm.