Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 172 Hüküm no: 198 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef b. İsak’ın Rus asıllı cariyesi İrene bt. Yovan’ı kendisine altı sene hizmet etmesi durumunda azad edeceğine dair ikrarı Mahmiye-i Galata muzâfâtından kasaba-i Beşiktaş’a tâbi‘ Orta nâm karyede sâkin Portakal cemâ‘atinden Yasef v. İsak nâm Yahudi mahfil-i kazâda câriye-i memlûkesi olup rıkkına mu‘terife olan işbu râfi‘atü’s-sifr orta boylu açık kaşlı göğ elâ gözlü ve sol elinin orta parmağında eser-i cerhi olup Rusiyyetü’l-asl İrene bt. Yovan nâm Nasrâniye muvâcehesinde takrîr-i kelâm ve ta‘bîr ani’l-merâm edüp mevsûfe-i mezkûreyi târih-i kitâbdan altı sene tamâmına değin bana hizmet etmek üzere kitâbete kesdim sinîn-i mezkûrenin itmâmı hâlinde mülkümden ihrâc sâir harâir-i asliyyât gibi hürre olsun dedikde mukırr-ı mezbûr Yasef’in vech-i meşrûh üzere cârî ve sâdır olan ikrârını câriye-i mezbûre kabûl ve tasdîk etmeğin mâ-vaka‘a bi’t-taleb ketb olundu. Tahrîren fi’l-yevmi’l-ışrîn min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mustafa Çelebi el-hammâmî, Arslan Beşe b. Hasan, Receb Beşe b. Ahmed, Mehmed Beşe b. Hasan, Halil Beşe b. Haydar, Yusuf Bey b. Abdullah, Salih Çelebi b. Şaban ve gayruhüm.