Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 183 Hüküm no: 216 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Saliha Hanım’ın mirası hususunda kız kardeşi Raziye’nin kardeşi Hüseyin’in zimmetini ibra ettiği Mahmiye-i Galata mahallâtından Bereketzâde mahallesinde sâkine iken bundan akdem müteveffât olan Saliha bt. Hasan nâm hatunun verâseti li-eb er karındaşı Hüseyin nâm kimesneye ve li-ebeveyn kız karındaşı Râziye nâm hatuna münhasıra olduğu şer‘an zâhir ve mütebeyyin oldukdan sonra mezbûr Hüseyin meclis-i şer‘-i hatîr-i lâzımü’t-tevkīrde müteveffât-ı mezbûrenin muhallefâtına vâzı‘atü’l-yed olan mersûme Râziye Hatun tarafından husûs-ı âti’l-beyânı tasdîka vekîl olup nehc-i mu‘teber-i şer‘î üzere vekâleti sâbite olan zevci işbu râfi‘ü’l-kitâb Mustafa Çelebi b. Abdi Efendi mahzarında bi-tav‘ihî ikrâr ve takrîr-i kelâm edüp müteveffât-ı mezbûrenin muhallefâtından esâs-ı beyt ve evânî-i nühâs ve gayr-ı nühâsdan bi’l-cümle ism-i mâl ıtlâk olunan metrûkâtından bana isâbet eden hisse-i şer‘iyyem mukābelesinde müvekkile-i mezbûre yedinden on beş kıt‘a esedî guruş alıp kabz edüp muhallefât-ı müteveffât-ı merkūma müte‘allik cemî‘ de‘âvî ve mütâlebâtdan müvekkile-i mezbûrenin zimmetini ibrâ ve ıskāt eyledim ba‘de’l-yevm husûs-ı mezbûra müte‘allik vechen mine’l-vücûh da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’l-âşir min-şehri Ramazâni’l-mübârek li-sene isneteyn ve sittîn ve elf. Şühûdü’l-hâl: Mahmud Efendi el-imâm, İbrahim Halîfe müezzin, Arslan Beşe b. Hasan, İbrahim Çelebi b. Yahya, Ali Beşe b. Mahmud, Ali Beşe b. İbrahim, Mehmed Beşe b. Hasan, Receb Beşe, Mehmed Beşe.