Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 182 Hüküm no: 215 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varilci Papa Anayi v. Cani’nin Pero v. Yani’den bin iki yüz akçe alacağı olduğu Varilci tâifesinden işbu râfi‘ü’s-sifr Papa Anayi v. Cani nâm zimmî mahfil-i kazâda tâife-i mezbûrede Pero v. Yani nâm zimmî muvâcehesinde üzerine da‘vâ ve takrîr-i kelâm edüp bundan akdem mezbûr Pero’ya varilcilik işlemek için beher şehr ikişer yüz altmış yedişer akçeden bir senede üç bin iki yüz dört akçeye nefsimi îcâr edüp ol dahi ber-vech-i muharrer istîcâr eyledikden sonra yevm-i akidden târih-i kitâb gününe gelince dokuz ay mürûr etmeğin hâlâ akd-i mezbûru beynimizde fesh eylemeğin zikr olunan dokuz ayda müstahık olduğum cem‘an iki bin dört yüz üç akçe ücretimin bin iki yüz akçesini yedinden alıp kabz edüp bâkī bin iki yüz akçe ücretimi hâlâ taleb eylediğimde vermede te‘allül eder suâl olunup alıverilmesi murâdımdır dedikde gıbbe’s-suâl mezbûr Pero cevâbında fi’l-vâki‘ bâlâda zikr olunduğu [67b] üzere müdde‘î-i mezbûr ile akd-i mezkûru beynimizde fesh eylediğimizde zimmetimde bâkī bin iki yüz akçe ücreti kaldı deyü ikrâr ve i‘tirâf eylemeğin mûcibiyle tenbîh birle mâ-vaka‘a bi’t-taleb ketb olundu. Tahrîren fi’l-yevmi’l-hâmis aşer min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mustafa Beşe b. Mehmed, Ahmed Çelebi b. Receb, Mehmed Çelebi b. Ramazan, Cafer Beşe b. Mehmed ve gayruhüm.