Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 184 Hüküm no: 218 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi b. Mehmed’in evinin üstüne yapacağı odaya komşusu Mustafa Çorbacı’nın müdahalesinin men‘i Husûs-ı âti’l-beyânı mahallinde tahrîri iltimâs olunmağın bu fakīr hâssa mi‘mârlarından Üstâd Ahmed b. Abdullah ve Üstâd Mustafa b. Ali ve zeyl-i kitâbda mastûru’l-esâmî olan Müslimîn ile mahmiye-i Galata hâricinde Başmakçı Şücâ‘ mahallesinde sâkin râfi‘ü hâze’l-kitâb fahrü’l-a‘yân Hüseyin Çelebi b. Mehmed nâm kimesnenin mahalle-i mezbûrede vâki‘ menziline varılup akd-i meclis-i şer‘-i şerîf olundukda mezbûr Hüseyin Çelebi meclis-i merkūmda câr-ı mülâsıkı Mustafa Çorbacı mahzarında takrîr-i da‘vâ edüp zikr olunan menzilimde müceddeden bir bâb fevkānî oda binâ ve ihdâs eylemek murâd eylediğimde mezbûr Mustafa Çorbacı mâni‘ olur suâl olunup bî-vech mu‘ârazadan men‘ olunmasını taleb ederim dedikde gıbbe’s-suâl merkūm Mustafa Çorbacı cevâbında merkūm Hüseyin Çelebi’nin hâlâ ihdâs murâd eylediği odanın cânib-i şimâlîsinde buçuk zirâ‘ sarkındı vaz‘ etmekle sâlifü’z-zikr sarkındının mâ’-i matardan müctemi‘ olan damlası benim menzilim saçağı üzerine nüzûl edüp küllî zararı vardır mi‘mârân-ı mezbûrân mahall-i mersûma nazar etsinler eğerçi vech-i ma‘kūl ile def‘ olmak mümkün ise ben dahi râzıyım deyicek mi‘mârân-ı merkūmân münâza‘un-fih olan mahalle nazar eylediklerinde sâlifü’l-beyân olan sarkındının tabanına muttasıl olup Hüseyin Çelebi oluk vaz‘ etmekle zikri mürûr eden damlanın zararı def‘ olur deyü haber verdiklerinden sonra hâzırûn bi’l-meclis olan bî-garaz müslümânlar dahi husûs-ı mezbûrda ittifâk ve ittihâd etmeğin mezbûr Hüseyin Çelebi vech-i meşrûh üzere zikr olunan sarkındının tabanına muttasıl oluk vaz‘ etmek üzere merkūm Mustafa Çorbacı mu‘ârazadan men‘ birle mâ-vaka‘a bi’t-taleb ketb olundu. Tahrîren fi’l-yevmi’l-ışrîn min-şehri Ramazâni’l-mübârek li-sene isneteyn ve sittîn ve elf. Şühûdü’l-hâl: Musa b. Yusuf, el-Hâc İbrahim b. Abdullah, Mustafa Beşe b. Mehmed, Mehmed Çelebi b. Receb, Mehmed Çelebi b. Sefer, el-Hâc Ali b. Abdullah, Mustafa Bey b. Hüseyin el-cündi, el-Hâc Kenan b. Abdullah, Mehmed b. Hüseyin ve gayruhüm.