Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 184 Hüküm no: 219 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahalinin şikâyeti üzerine yapılan keşifte Hüseyin Çelebi b. Mehmed’in umumî yoldan yer gaspetmediğinin anlaşıldığı Husûs-ı âti’l-beyânın mahallinde tahrîri iltimâs olunmağın bu fakīr ve hâssa mi‘mârlarından Üstâd Ahmed b. Abdullah ve Üstâd Mustafa b. Ali ve zeyl-i kitâbda mastûru’l-esâmî olan Müslimîn ile mahmiye-i Galata hâricinde Başmakçı Şücâ‘ mahallesinde sâkin mefharü’l-akrân Hüseyin Çelebi b. Mehmed’in menziline varılup akd-i meclis-i şer‘-i şerîf olundukda ahâlî-i mahalle-i merkūmeden el-Hâc Ali b. Abdullah ve Mustafa b. Hüseyin ve el-Hâc Kenan b. Abdullah ve Mehmed b. Hüseyin ve el-Hâc İbrahim b. Abdullah nâm kimesneler ve sâirleri bi-ecma‘ihim meclis-i mezbûrda merkūm Hüseyin Çelebi mahzarında herbiri takrîr-i da‘vâ edüp mezbûr Hüseyin Çelebi menziline muttasıl olan tarîk-i âmdan garb tarafından buçuk zirâ‘ mikdârı arz-ı hâliyeyi gasb ve üzerine binâ ihdâs etmişdir mahall-i mezbûr ba‘de’l-müşâfehe ke’l-evvel tarîk-i âm ittihâz olunmak murâdımızdır dediklerinde mi‘mârân-ı mezbûrân münâza‘un-fih olan mahalle nazar eylediklerinde aslâ ve kat‘â mezbûr Hüseyin Çelebi’nin tarîk-i âm üzerinde eser-i binâsı olmadığı ve ahâlî-i mahallenin iddiâsı üzere mezbûr Hüseyin Çelebi’nin bi-tarîki’l-müzâde? ihdâs eylediği duvarın tarîk-i âmma zararı olmadığını haber vermeğin vâki‘ hâl bi’t-taleb ketb olundu. Fi’l-yevmi’l-hâmis ve’l-ışrîn min-şehri Ramazâni’l-mübârek li-sene isneteyn ve sittîn ve elf. Şühûdü’l-hâl: Musa b. Yusuf, Mustafa Beşe b. Mehmed, Mehmed Çelebi b. Sefer, Ahmed b. Hasan ve gayruhüm.