Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 200 Hüküm no: 243 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Maşyoz’un merhum Mehmed Çelebi’nin çocuklarından aldığı borç karşılığında evini rehin verdiği Mahrûse-i Galata muzâfâtından kasaba-i Beşiktaş’a tâbi‘ Kuruçeşme nâm karye sükkânından Yamandi v. Maşyoz nâm zimmî mahfil-i kazâda karye-i merkūmede sâkin iken mukaddemâ müteveffâ olan Mehmed Çelebi b. Ahmed’in evlâd-ı sıgārına kıbel-i şer‘den mansûbe vasîleri olan vâlideleri Bâdyeldân bt. Abdullah nâm hatunun tarafından ikrâr-ı âti’l-beyâna tasdîka vekîl olup bi-mâ hüve nehcü’s-sübût şer‘an vekâleti sâbite olan es-Seyyid Ali Çelebi b. es-Seyyid Abdülkādir nâm kimesne mahzarında ikrâr ve takrîr-i kelâm edüp vasiyye-i mezbûre yedinden sıgār-ı mezkûre elinden altmış kıt‘a riyâlî guruş ve beynimizde yüz zirâ‘ ma‘lûm çuka bahâsından dahi beş kıt‘a esedî guruş ki cem‘an altmış riyâlî ile beş esedî guruş istikrâz ve kabz eylediğimde ol dahi ikrâz ve teslîm eyledikden sonra karye-i mezbûrede vâki‘ bir tarafı Mihal nâm zimmî mülkü ve üç tarafı tarîk-i âm ile mahdûd mülk menzilimi vasiyye-i merkūmeye rehin vaz‘ [ve] teslîm edüp ol dahi irtihân ve tesellüm eyledi eğer târih-i kitâbdan yüz elli gün tamâmına değin meblağ-ı mezbûru merkūme Bâdyeldân’a edâ ve teslîm etmez isem menzil-i mezbûru ba‘de’l-müzâyede semen-i misli ile âhara bey‘ edüp meblağ-ı mezbûru istîfâ ve kabz eyledikden sonra fazla kalır ise bana teslîm etmek üzere “küllemâ azeltüke fe-ente vekîlî” mısdâkınca azl [ve] in‘izâlden masûn vekâlet-i devriye ile mezbûre Bâdyeldân’ı tarafımdan vekîl ve nâib-i menâb nasb ü ta‘yîn eylediğimde ol dahi vech-i muharrer üzere vekâlet-i mezbûreyi kabûl eyledi dedikde gıbbe’t-tasdîki’ş-şer‘î meblağ-ı mezbûrun mecmû‘una karye-i mezbûreden Kiryazi v. Yani nâm zimmî tarafından emr ve kabûlü hâvî kefâlet-i sahîha-i şer‘iyye ile kefîl olmağın mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Şevvâli’l-mükerrem sene isneyn ve sittîn ve elf. Şühûdü’l-hâl: İsmail Beşe b. Hasan, es-Seyyid Abdulbâki b. es-Seyyid Ahmed, Mehmed Bey b. Abdullah el-cündi, İbrahim Bey b Abdullah el-cündi, Süleyman Bey b. Abdullah el-hammâmî, Mustafa Beşe b. Mehmed, Hızır Efendi b. Nasûh el-müderris, Cafer b. Mehmed, Mehmed b. Ramazan.