Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 199 Hüküm no: 242 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro v. Yani’nin Nikola v. İskeli tarafından dövüldüğünü şahitlerle ispat ettiği Mahrûse-i Galata’ya tâbi‘ kasaba-i Beşiktaş’da sâkin kuyumcu tâifesinden Nikola v. İskeli nâm zimmî mahfil-i kazâda yine tâife-i mezbûreden Petro v. Yani nâm zimmî muvâcehesinde üzerine da‘vâ ve takrîr-i kelâm edüp mezbûr Petro târih-i kitâb günü kasaba-i merkūmede kenîse kurbünde kuyûmî âlâtından üsküli ta‘bîr olunur bir demir ile sol kolumda ve sol butumda darb-ı şedîd ile beni darb eyledi suâl olunup mûcibi icrâ olunması matlûbumdur dedikde gıbbe’s-suâl ve’l-inkâr müdde‘î-i mezbûrdan da‘vâsına mutâbıka beyyine taleb olundukda kasaba-i mezbûre sâkinlerinden Kiryazi v. Preskova ve Dermo v. Anton nâm zimmîler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr Petro târih-i kitâb [günü] kasaba-i merkūmede kenîse kurbünde müdde‘î-i merkūmu bizim huzûrumuzda zikr olunan demir âlet ile sol kolunu ve sol butunda darb-ı şedîd ile darb eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcibi ile mâ-vaka‘a bi’t-taleb ketb olundu. Şühûdü’l-hâl: Mustafa Beşe b. Mahmud, Mehmed Çelebi b. Mahmud, Cafer b. Mehmed, Mehmed ve gayruhüm.