Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 202 Hüküm no: 248 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avni Ömer Efendi’nin minare yaptırdığı Arslan v. Andreya ve Mıgırdıc v. Şaher adlı taşcılara borcunu ödediği Ashâb-ı hayrâtdan mahrûse-i Galata hâricinde kendüye intimâ olan mahalle sâkinlerinden mefhar-i ekâbir-i e‘âlî hâvî-i meâsir-i me‘âlî mihr-i sipihr sadef-i safâ âsmân-ı hodbîni yenbû‘-ı mekârim menbû‘-ı ekârim Avni Ömer Efendi b. el-merhûm ( ) tarafından husûs-ı âti’l-beyâna vekîl olup nehc-i mu‘teber-i şer‘î üzere şer‘an vekâleti sâbite olan zahrü’l-kuzât Mustafa Efendi b. Hasan meclis-i şer‘-i şerîf-i lâzımü’t-teşrîfde taşçı tâifesinden A[r]slan v. Andreya ve Mıgırdıç v. Şaher nâm Ermeniler muvâcehelerinde bi’l-vekâle ikrâr ve takrîr-i kelâm edüp müvekkil-i mûmâ-ileyh mahalle-i mezbûrede müceddeden binâ ve ihdâs eylediği câmi‘-i şerîfe bir minâre binâ etmeğe mezbûrân ile cümle levâzımını kendilerin olmak üzere yüz on üç bin fıddî râyic [fi’l]-vakt akçeye beynlerinde akd-i ma‘hûd etmişler idi el-hâletü hâzihî mezbûrân Arslan ve Mıgırdıç zikr olunan minâreyi tamâm eyleyüp meblağ-ı mezbûrun yüz beş bin akçesini bundan esbak müvekkil-i müşârun ileyhin yedinden alıp ve kabz edüp hâlâ meblağ-ı bâkī sekiz bin akçeyi dahi alıp kabz eylemişlerdir suâl olunup takrîrleri tahrîr olunmasını taleb ederim dedikde gıbbe’l-istintâk mezbûrân Arslan ve Mıgırdıç cevâblarında fi’l-vâki‘ hâl minvâl-i muharrer üzere olup mukaddemâ zikr olunan minâreyi cümle levâzımını kendimizin olmak üzere müvekkil-i müşârun ileyh ile yüz on üç bin mezbûrü’n-na‘t akçe üzerine beynimizde akd-i ma‘hûd eyleyüp mârrü’z-zikr minâre tamâm olmağın meblağ-ı mezbûrun yüz beş bin akçenin mukaddemâ müvekkil-i mûmâ-ileyhin yedinden alıp kabz eylediğimizdan sonra meblağ-ı bâkī sekiz bin akçeyi dahi hâlâ yedinden alıp kabz eyledik min-ba‘d meblağ-ı mezbûr yüz on üç bin akçeden müvekkil-i müşârun ileyhin zimmetinde bir akçe ve bir habbe hakkımız kalmadı dediklerinde vâki‘ hâli hıfzan li’l-mekāl bi’t-taleb ketb olundu. Fi’l-yevmi’r-râbi‘ ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: Hızır Efendi b. ( ) el-müderris, Gazanfer Beşe b. Abdullah, Veli Beşe b. İbrahim, huddâm-ı mahkeme.