Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 219 Hüküm no: 273 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Paşa Zaviyesi’nin harap olan kısımlarının mütevellisinin izniyle Mehmed Ağa b. Abdullah tarafından tamiri Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ Abdullah? irsâl olunup ol dahi hâssa mi‘mârlarından Üstâd Ahmed b. Abdullah ve Üstâd Mustafa b. Abdullah nâm kimesneler ve zeyl-i sahifede mastûru’l-esâmî olan Müslimîn ile mahrûse-i Galata’ya tâbi‘ kasaba-i Beşiktaş’da vâki‘ merhûm Hüseyin Paşa Zâviyesi’ne varup akd-i meclis-i şer‘-i şerîf eyledikde bi’l-fi‘il zâviye-i mezbûre mütevellîsi olan Mustafa Dede b. ( ) meclis-i mezbûrda zâviye-i merkūma mülâsık lede’l-ahâlî ve’l-cîrân ma‘lûmü’l-hudûd menzile mutasarrıfe olan hâlâ (…) ağası umdetü’l-emâcid ve’l-ekârim Mehmed Ağa b. Abdullah mahzarında bi’t-tevliye ikrâr ve takrîr-i kelâm edüp zâviye-i mersûme ile menzil-i merkūm beyninde olan tahta duvar ve zâviye-i mersûmenin matbahı bi’l-külliyye harâba müşrif olup taraf-ı vakfın ta‘mîr ve meremmete müsâ‘ade olmadığına binâen mûmâ-ileyh kethüdâ kendi mâlınan ta‘mîr ve meremmet etmeğe bana mürâcaat etmekle ben dahi tevliyetim hasebiyle vech-i muharrer üzere müşârun ileyh Mehmed Ağa’ya izin verdiğim ecilden zikr olunan duvar ile matbaha harc u sarf olunacak meblağ ba‘de’t-tahmîn ve’t-takvîm tahrîr olunmasını taleb ederim dedikde mi‘mârân-ı mezbûrân zikr olunan duvarı ve matbahı mesâha ve tahmîn eylediklerinde ancak yirmi bin akçe ile hâsıl olur deyü icmâ‘ ve ittifâk etdiklerinden sonra mûmâ-ileyh Mehmed Ağa dahi mârrü’l-beyân olan duvarı ve matbahı vech-i muharrer üzere kendi malından ta‘mîr ve meremmet etmeğe ta‘ahhüd etmeğin vâki‘ hâl mevlânâ-yı mezbûr mahallinde tahrîr edüp ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Tahrîren fî evâsıtı Şevvâli’l-mükerrem li-sene isneteyn ve sittîn ve elf. Şühûdü’l-hâl: Mehmed Efendi el-kâtib, Osman Ağa b. ( ), Mehmed Ağa b. ( ), Mehmed Çelebi b. ( ), Ahmed Çelebi b. Cüce ve gayruhüm.