Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 220 Hüküm no: 274 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Arslan ile Panayot v. İlya aralarındaki alacak verecek hususunda sulh oldukları Mahrûse-i Galata’ya tâbi‘ kasaba-i Beşiktaş mahallâtından Sinanpaşa mahallesi sükkânından Yanaki v. Arslan nâm zimmî mahfil-i kazâda işbu râfi‘ü hâze’l-kitâb Panayot v. İlya nâm zimmî muvâcehesinde bi-tav‘ihî ikrâr ve takrîr-i kelâm edüp bundan esbak mezbûr Panayot meyhânemde destgâhdârım iken beynimizde nice ahz u i‘tâ vâki‘ olmağla beynimizde hesâb eylediğimizde ba‘de külli hesâb mezbûrun zimmetinde bin akçe hakkım zuhûr etmeğin meblağ-ı mezbûru taleb eylediğimde ol dahi inkâr edüp ben dahi müdde‘âmı isbât sadedinde iken beynimizde münâza‘ât-ı kesîre ve muhâsamât-ı şedîde vâki‘ olmuşidi el-hâletü hâzihî beynimize muslihûn tavassut edüp da‘vâ-yı mezkûrumdan beni beş yüz akçe üzerine inşâ-i akd-i sulh eylediklerinde ben de sulh-ı merkūmu kabûl ve bedel-i sulh olan meblağ-ı mezbûr beş yüz akçeyi mezbûr Panayot yedinden bi’t-tamâm alıp kabz edüp mâ‘adâdan mezbûrun zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm merkūm Panayot ile husûs-ı merkūma müte‘allika benden bi’z-zât ve bi’l-vâsıta da‘vâ ve nizâ‘ sudur eder ise lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneyn ve sittîn ve elf. Şühûdü’l-hâl: Hızır Efendi el-kâtib, Mustafa Beşe b. Mehmed, Cafer b. Mehmed, Mehmed b. Ramazan ve Mahmud b. Ahmed ve gayruhüm.