Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 220 Hüküm no: 275 Orijinal metin no: [81b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Ali Çelebi’nin Yanaki b. Hıristordori aleyhine açtığı menzil davasında iddiasını ispat edemediği Mahrûse-i Galata muzâfâtından kasaba-i Beşiktaş’da Sinanpaşa mahallesinde sâkin iken bundan akdem müteveffâ olan Ali Çelebi b. Mehmed’in sulbî kebîr oğlu ve hasren vârisi olan Mustafa Çelebi nâm şâbb-ı emred mahfil-i kazâda menzil-i âti’l-beyâna vâzı‘ü’l-yed olduğu şer‘an sâbit olan işbu hâmilü’s-sifr Yanaki v. Hıristordori nâm zimmî muvâcehesinde üzerine da‘vâ ve takrîr-i kelâm edüp mahalle-i mersûmede vâki‘ bir tarafı Emine Hatun bt. Mustafa mülkü ve bir tarafı Hayyât Yanaki v. Dimo mülkü ve tarafeyni tarîk-i hâs ile mahdûd iki bâb beyt-i ulvî ve tahtında bir bâb mahzeni müştemil menzil babam müteveffâ-yı mezbûrun vâlidesi olup bundan akdem müteveffât olan Şemsi bt. Abdullah nâm hatunun hâl-i sıhhatinde mülkü olup ba‘de vefâtihâ sülüsânı babam müteveffâ-yı mezbûra ve sülüsü müteveffât-ı mezbûrenin sadriye kebîre kızı Âişe nâm hatuna intikāl edüp kable’l-kısme babam mezbûr Ali dahi fevt olup verâseti ve menzil-i merkūmda olan hisse-i merkūmesi hasren bana intikāl edüp kable’l-kısme mezbûre Âişe dahi müteveffât olmağın [82a] hâlâ sâlifü’z-zikr menzilde olan hisse-i şâyi‘ama mezbûr Yanaki bi-gayrı vechin vaz‘-ı yed eder suâl olunup yed-i âriyesi kasr ve izâle olunmasın taleb ederim dedikde gıbbe’s-suâl mezbûr Yanaki cevâbında menzil-i mezbûr eğerçi mukaddemâ müteveffât olan mezbûre Şemsi Hatun’un mülkü idi lâkin merkūme Şemsi hâl-i hayâtında bin otuz beş senesi Cumâdelâhiri evâhirinde mahrûse-i mezkûrede nâibü’ş-şer‘i’ş-şerîf olan Ahmed Efendi b. İbrahim huzûrunda kızı müteveffât-ı mezbûre Âişe’ye on altı bin nakd-i râyic [fi’l]-vakt akçeye bâtten bey‘ ve teslîm-i mebî‘ eyleyüp semeni olan meblağ-ı merkūmun altı bin akçesini yedinden kabz edüp bâkī on bin akçesini müteveffât-ı mezbûre Âişe Hatun’a karz-ı şer‘îden deyni olan on bin akçe ile takās eyledikden sonra mezbûre Âişe dahi menzil-i mezkûra vech-i muharrer üzere mutasarrıfe iken bin elli iki senesi Recebi’nin evâilinde mahmiye-i Kostantıniyye’de Ahî Çelebi Mahkemesi’nde nâibü’ş-şer‘i’ş-şerîf olan İvaz Efendi b. Yusuf huzûrunda menzil-i mezkûru kızı oğlu işbu hâzır bi’l-meclis İbrahim Çelebi b. Merdan Bey nâm kimesneye otuz altı bin nakd-i râyic [fi’l]-vakt akçeye bâtten bey‘ ve teslîm-i mebî‘ ol dahi ber-vech-i muharrer iştirâ ve tesellüm eyledikde semeni olan meblağ-ı mezbûr otuz altı bin akçeyi mezbûr İbrahim Çelebi’nin sıgār-ı mezbûrûnun hâlinde vasîsi iken mâl-ı mevrûsundan kabz edüp zimmetinde edâsı lâzım olan otuz altı bin akçe deyni ile takās edüp menzil-i merkūm mezbûr İbrahim Çelebi’nin vech-i mübeyyen üzere mülk-i müşterâsı oldukdan sonra mezbûr İbrahim Çelebi dahi menzil-i merkūmu bundan esbak bana yirmi bir bin nakd-i râyic [fi’l]-vakt akçeye bey‘-i kat‘î ile bey‘ ve teslîm-i mebî‘ edüp ben dahi vech-i meşrûh üzere iştirâ ve tesellüm edüp semeni olan meblağ-ı merkūmu yedimden kabz eyleyüp târih-i kitâba gelince menzil-i merkūm mülk-i müşterâm olmak üzere tasarruf eyledim deyü takrîrât-ı meşrûhasına mutâbık müşârun ileyhimânın imzâları ile mümzât ve hatemleri ile mahtûm ve zikr olunan târihler ile müverraha hüccet-i şer‘iyye ibrâz eyleyüp hüccetân-ı mersûmetân müdde‘î-i mezbûrun muvâcehesinde feth ü kırâ’et olundukda gıbbe’l-istintâk müdde‘î-i merkūm dahi mazmûnlarını bi’l-külliyye münkir olmağın mersûm Yanaki’den evvelâ müteveffât-ı merkūme Şemsi Hatun menzil-i mezkûru kızı müteveffât-ı merkūme Âişe’ye ber-vech-i meşrûh bey‘ eylediğine beyyine taleb olundukda udûl-i Müslimînden ve sikāt-i muvahhidînden mefharü’l-kuzât Esad Efendi b. Mustafa ve Mehmed Çelebi b. Şaban nâm kimesneler li-ecli’ş-şehâde meclis-i şer‘a hâzırân olup isre’l-istişhâdi’ş-şer‘î fi’l-vâki‘ müteveffât-ı mezbûre Şemsi Hatun sıhhati hâlinde bizim huzûrumuzda menzil-i mezkûru kızı müteveffât-ı merkūme Âişe’ye bin otuz beş senesi Cumâdelâhiri evâhirinde mahrûse-i mezkûrede nâibü’ş-şer‘ olan mûmâ-[ileyh] Ahmed Efendi huzûrunda on altı bin akçeye bâtten bey ve teslîm-i mebî‘ eyleyüp semeni olan meblağ-ı merkūm altı bin akçesini yedinden kabz edüp bâkī on bin akçesini müteveffât-ı mezbûre Âişe’ye cihet-i karz-ı şer‘îden deyni olan on bin akçe ile takās eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra sâniyyen müteveffât-ı mezbûre Âişe dahi menzil-i mezbûru kızı oğlu mezbûr İbrahim Çelebi’ye otuz altı bin akçeye bey‘-i kat‘î ile bey‘, semeni deyn-i mezkûruna takās eylediğine beyyine taleb olundukda udûl-i Müslimînden Ahmed Kapudan b. Ali ve Yahya Çelebi b. Nasûh nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffât-ı mezbûre Âişe bizim huzûrumuzda bin elli iki senesi Recebi’nin evâilinde zikr olunan Ahî Çelebi Mahkemesi’nde nâibü’ş-şer‘ olan mûmâ-ileyh İvaz Efendi huzûrunda mezbûr İbrahim Çelebi’ye menzil-i mezbûru otuz altı bin akçeye bey‘-i kat‘î ile bey‘ ve teslîm-i mebî‘ eyledikde semen-i merkūmu mezbûr İbrahim Çelebi’ye sıgarı hâlinde vasîsi iken mâl-i mevrûsundan kabz edüp zimmetinde edâsı lâzım olan otuz altı bin akçe ile takās eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın müdde‘î-i mezbûr Mustafa Çelebi’yi merkūm Yanaki’yi bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şer[îfe] li-sene isneteyn ve sittîn ve elf. Şühûdü’l-hâl: Fahrü’l-müderrisîn Abdülhalîm Efendi b. Mehmed, Mefharü’l-müderrisîn Hızır Efendi, Mustafa Çelebi b. Mehmed el-müezzin, Ebûbekir Çelebi b. İbrahim el-müezzin, Süleyman Reis b. Hüseyin, Hasan Beşe b. Abdullah, Osman Çelebi b. Ali, Mustafa Beşe b. Mehmed, Mehmed b. Ramazan ve gayruhüm.