|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 206 Hüküm no: 159 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefat eden Yastıkçı Ali Ağa’nın Mağazacı Bogos’ta olan alacağının varislerine ödenmesi
Ma‘rûz,
Medîne-i Üsküdar’da Mirahur mahallesinde sâkin iken bundan akdem vefât eden Yastıkçı Ali Ağa b. Ahmed’in verâseti zevce-i menkûha-i metrûkesi Hadice Hatun bt. İbrahim ile sulbî kebîr oğlu Abdülaziz ve sulbiye kebîre kızı Âişe Hanım’a münhasıra olduğu lede’ş-şer‘i’l-enver zâhir ve mütehakkık oldukdan sonra verese-i mezbûrûndan ashâb-ı arzuhâl ibn-i merkūm Abdülaziz ile zâtları mu‘arrefe zevce-i merkūme Hadice Hatun ve bint-i mezbûre Âişe Hanım’dan herbiri Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde derûn-ı arzuhâlde mastûrü’l-ism Mağazacı Bogos v. Ohannes nâm zimmî muvâcehesinde mûrisimiz müteveffâ-yı mezbûrun mesfûr Bogos zimmî zimmetinde semen-i mebî‘den bâ-temessük altı bin guruş alacak hakkı olup meblağ-ı mezkûru kable’l-ahz ve’l-istîfâ fevt ve meblağ-ı mezkûr bize mevrûs olmağla meblağ-ı merkūm altı bin guruşu mesfûr Bogos zimmîden bi’l-verâse hâlâ taleb ederiz deyü da‘vâ etdiklerinde mersûm Bogos dahi cevâbında kaziyye minvâl-i meşrûh üzere olduğunu ikrâr ve i‘tirâf etmeğin mûcebince meblağ-ı mezkûr altı bin guruşun verese-i müdde‘ûn-ı mezbûrûn Abdülaziz ile Hadice Hatun ve Âişe Hanım’dan her birine edâ ve teslîme mesfûr Bogos zimmî ilzâm olunduğu huzûr-ı âlîlerine i‘lâm olundu. El-emru li-men-lehü’l-emr
Fî 19 M sene [12]57.
|