|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 207 Hüküm no: 160 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Sobacı Sarı Ahmed Vakfı’na ait istibdâli istenilen menzil ve mülk dükkânlar hakkında tahkikat yapılması
Ma‘rûz,
Sâdır olan fermân-ı âlîlerine imtisâlen medîne-i Sivas nâibi Müftüzâde es-Seyyid Mehmed Emin Sürûri Efendi mührü mutâbık arzuhâl ve hâmişinde mastûr derkenâra nazar ve mutâbık olundukda medîne-i mezbûrede Küçükminâre mahallesinde vâki‘ Sobacıoğlu Sarı Ahmed Vakfı musakkafâtından ma‘lûmü’l-hudûd üç bâb menzili bi’l-meşrûta mütevellîleri Mehmed Emin ile Salime ve Âişe hatunlar medîne-i mezbûrede vâki‘ Meydan Hamamı demekle arîf hamam külhanı nezdinde üç bâb mülk dekâkîn ile istibdâl için izni hâvî emr-i celîlü’ş-şân istid‘â eylediği meâl-i arzdan müstefâd ve bu makūle mülk dekâkîn vakıf olan menâzilden kıymeten ve rağbeten ve ücreten ve mahallen ezyed ve evfer ve istibdâli cânib-i vakfa enfa‘ ve evlâ olup şürût-ı istibdâl mevcûde bulunduğu sûretde istibdâli tecvîz eyleyen fukahâ-yı zevi’l-ibtihâcın kavilleri üzere mülk olan dekâkîn vakıf ve vakıf olan menâzil mülk olmak ve vakf-ı evvelin şürûtu vakf-ı sânîde îcâr olunmak üzere istibdâl olunup tarafeynden hüccet-i şer‘iyye verilmek için bâ-irâde-i aliyye Dîvân-ı hümâyûn tarafından emr-i şerîf verildiği müstebân olup bu sûretde zikr olunan vakıf menâzil ile sâlifü’l-beyân üç bâb mülk dekâkînin mahallerinde lede’l-keşf ve’l-mu‘âyene arsa ve ebniyelerinin mikdâr ve zirâ‘ ve kıymetleri derûn-ı arzda beyân olunmadığından ol vechile sıhhat-i şerâit-i istibdâl bulunmamağla mârru’z-zikr vakıf menâzil ile sâbıku’l-beyân üç bâb mülk dekâkînin arsa ve ebniyelerinin başka başka lede’l-misâha ve’t-tahmîn mikdâr-ı kıymetleri zikr olunarak mülk dekâkîn-i mezkûrun vakıf menâzilden vech-i meşrûh üzere ezyed ve evfer ve istibdâli cânib-i vakfa enfa‘ ve evlâ ise istibdâl olunmasına izn-i hümâyûnu mutazammın emr-i âlî i‘tâsı muvâfık-ı şer‘-i şerîf olacağı huzûr-ı âlîlerine i‘lâm olundu. El-emru li-men-lehü’l-emr.
Fî 5 M sene [12]57.
|