Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 131 Hüküm no: 78 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Safiye bt. Mustafa’nın kendisini boşayan kocasındaki alacaklarını alarak zimmetini ibra etmesi Tatlîk Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan Safiye bt. Mustafa nâm hatun meclis-i şer‘-i hatîr-i lâzımü’t-tevkīrde zevc-i mutallıkı işbu bâ‘isü’l-kitâb Mehmed b. Ahmed nâm kimesne mahzarında ikrâr ve takrîr-i kelâm edip mezbûr Mehmed zevc-i dâhilim olduğu hâlde târih-i kitâbdan beş gün mukaddem beni tatlîk etmekle zimmetinde ma‘kūdun-aleyh olan on guruş mehr-i müeccelimin beş guruşu ile nafaka-i iddet-i mu‘ayyene ve meûnet-i süknâm içün bi’t-terâzî beynimizde ta‘yîn olunan üç guruş ki cem‘an sekiz guruşu zevc-i mutallıkım mezbûr işbu meclis-i şer‘de bana def‘ ü teslîm eyledikde ben dahi yedinden tamamen ahz ü kabz edip mehr-i müeccelimden bâkī beş guruşa ve hukūk-ı zevciyete müte‘allika âmme-i de‘âvî ve kâffe-i mutâlebâtdan benim zevc-i mutallıkım mezbûr Mehmed’in zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 13 Zilka‘de sene 1196 Şühûdü’l-hâl: Çukadâr-ı mahkeme Ali Ağa, Hüseyin Çelebi, Hacı Hasan b. Osman, Molla Ali b. Halil, Salih b. Halil.